Зорлық-зомбылық көрген балаларға арнайы кабинеттер ашылады
Көмек кабинеттерінде кәмелетке толмағандарға «бір терезе» қағидаты бойынша кешенді қолдау көрсетіледі.
Астана, NEGE. Бұл жөнінде Оқу-ағарту министрлігі хабарлады.
«Балаға қолайлы ортада алғашқы психологиялық көмектен бастап сот-медициналық сараптамадан өтуге және бейінді мамандардың қатысуымен сауалнама жүргізуге дейінгі барлық қажетті қызметтер бір жерде көрсетіледі. Бұл баланың көптеген ұйымға бару қажеттілігін жойып, психологиялық тұрғыдан қайта жарақат алуына жол бермейді», – дейді министрлік өкілдері.
Жақын арада кабинеттердің қызмет қағидалары бекітіліп, содан кейін өңірлерде кезең-кезеңімен ашыла бастайды.
Бұл жаңашылдық «Құқық бұзушылықтардың алдын алу туралы» заңда көзделген. Тиісті норма 2 наурыздан бастап күшіне енді.