Жұлдызы жанған дуэттер

«Азия» мен «Бақай» тобының мүшелері өзге елдің танымал жұлдыздарымен ән шырқамай-ақ ортақ туындылары бірден хитке айналған еді. «Опмай-опмайдың» сәтті қадамы қос топтың достығын арттырды. Хитмендер 2020 жылы тағы бір су жаңа әнмен шоу-бизнеске жаңалық әкелмек.

Нұржан Керменбаев дуэт жазудан жалығар емес. Шоу-бизнестегі әріптестерімен тандем құруды әдетке айналдырған "Қапқарашка" Әділ есімді оралдық өнерпазбен бірігіп, жаңа туындыны ұсынған еді. Өнер иелеріне сәттілік әкелген туындының бірі «В сердце» әні.  Дәл осы әнмен былтыр қос өнерпаз «Жыл таңдауы» ұлттық музыкалық жобасында жүзден жүйрік шығып, үздіктерге табысталатын арнайы сыйлыққа ие болды. Енді Керменбаев өзге әншімен дуэт құруды ойластырып жүр.

Нұржан Керменбаев: Жақында тағы бір дуэт болып қалуы мүмкін.  Квартет те құруым әбден мүмкін. Негізі Әділ екеуміз жалғастырамыз деп шештік. Мүмкін, құрамды өзгертеміз. Мүмкін, тағы бір бала қосылады немесе екі жігіт.  Алланың қалауымен көреміз, бұйырғаны болады. Бірақ тағы бір жақсы дүниені міндетті түрде күтіңіздер.

Ал Гамза-заде 2019 жылы Айдана Меденовмен дуэт құрып, үздіктер тізіміне іліккенімен, биыл өзге орындаушымен қосыла ән шырқауды көздейді.

Серік Гамза-заде: Міндетті түрде дуэт болады. Әзірге бір адаммен келісім жүргізіп жатырмыз. Кім екенін атпай-ақ қояйын.  Ол - ер адам. Қазақстанға танымал адам.

Сәтті шыққан дуэттердің тізімінде Мәди Рымбев пен Бонапарттың әні де бар. Қос өнерпаздың шығармашылық тандемі 2020 жылы да жалғасын таппақ.