Жетісудың Көксу ауданында соңғы үш жылда 46,9 мың гектар жер мемлекетке қайтарылды

Алматы, NEGE. Бүгінгі күнге қайтарылған жерлердің 30,2 мың гектары немесе 64,4% айналымға тартылды. Соның 16,4 мың гектары конкурс арқылы 13,8 мың гектары ауданның барлық ауылдық округтеріне қоғамдық жайылым ретінде берілді. Бұл жайында облыс әкімі Бейбіт Исабаевтың аудан тұрғындарымен кездесуі барысында белгілі болды, - деп хабарлайды Жетісу облысы әкімінің баспасөз қызметі.

Осы ретте биылғы жылы 41 учаскеге 3 конкурс ұйымдастырылып, 6,4 мың гектар жер табысталды. Қайтарлылған жердің қалған 16,7 мың гектары шаруа қожалығымен айналысамын деген азаматтарға конкурс арқылы 2026 жылдың 1 жартысының соңына дейін берілетін болады. Осыған байланысты Көксу ауданының аграрлық бағытын ескере отырып, бұл жұмыстарды жандандыру тапсырылды.

«Ауыл шаруашылығында ауданда биылғы жылдың 9 айында 24,3 млрд. теңгенің өнімі өндірілді. Мұндағы егіс алқаптарының көлемі 30,7 мың гектар. Бүгінгі күнге 8,8 мың гектар бидай және арпа толық орылып, 17,7 мың тонна астық бастырылды. 1,8 мың гектар жүгерінің 1,4 мың гектары орылып, 12,5 мың тонна өнім жиналды. Сондай-ақ себілген 11,5 мың гектар майбұршақтың 8 мың гектары жиналып, 18,3 мың тонна өнім алынды. Мемлекет тарапынан бұл бағытта көмек көрсетіліп, субсидиялар, жеңілдетілген несиелер беріліп келеді. Аудан дихандары осы мүмкіндіктерді пайдаланып, 47 бірлік ауыл шаруашылығы техникасын сатып алды. «Кең Дала-2» бағдарламасы аясында 30 өтінім бойынша 605,8 млн. теңге жеңілдетілген несие берілді», - деді Б. Исабаев.

Өз сөзінде өңір басшысы аудандағы суармалы жерлерді тиімді пайдалану мақсатындағы су шаруашылығы нысандарын жаңғырту мәселесіне де назар аударды. Осы мақсатта Ислам Даму Банкінің қаражаты есебінен «Көксу ауданының суару желілерін қайта жаңарту жобасы» іске асырылуда. Жоба 2027 жылы толық аяқталып, соның нәтижесінде 16 мың гектарға жуық аумақта сумен қамту жақсартылады.

Жиында ветеринария мәселесі де сөз болды. Мәселен, ветеринариялық қызметтің сапасын арттыру мақсатында соңғы екі жылда 8 ауылда – Қаблиса, Алғабас, Еңбекші, Мұқаншы, Мұсабек, Жарлыөзек, Айнабұлақ, Балпық би елді мекендерінде блокты-модульдік ветеринариялық пункттер орнатылды, 4 автокөлік сатып алынды.

Жалпы есеп беру жиынында аудан халқының өмір сүру сапасын арттыруға бағытталған шаралар мен әлеуметтік-экономикалық дамудың негізгі басымдықтарына басты назар аударылды.

Бейбіт Исабаевтың айтуынша, шағын және орта бизнесті дамыту - экономиканың тұрақтылығын қамтамасыз етудің маңызды факторларының бірі. Мәселен, Көксу ауданында жұмыс істеп тұрған 4,5 мыңнан астам бизнес субъектісі бар, онда 6,5 мың адам жұмыспен қамтылған. Биылғы жылғы 1 қазандағы жағдайы бойынша кәсіпкерлікті қаржылай қолдау аясында 1,9 млрд. теңгеге 10 жоба қаржыландырылды.

Облыс әкімі халықпен өткен жылғы кездесуде тұрғындар көтерген мәселелердің жай-жапсарына да тоқталды. Атап айтқанда, Балпық би ауылының тұрғыны Салтанат Әбдірахманованың ауылға түнгі көше жарық шамдарын орнату туралы өтініші оң шешімін тауып, ауыл көшелеріне жарықтандыру тіректері орнатылған.

Кездесу барысында аудан тұрғындары өздерін толғандырған басқа да мәселелерге қатысты сұрақтар қойды. Екі мыңнан астам адам тұратын З.Тамшыбай ауылында тұрғындарды көптен бері ауызсу мәселесі алаңдатып келеді, себебі 1970 жылдары салынған су құбыры желілері әбден ескіріп, апаттар мен судың уақытша тоқтап қалуына жиі себеп болуда. Жауаптан белгілі болғандай, ауылдың сумен жабдықтау жүйесін қайта жаңғырту және жаңа желілер салудың жобалық-сметалық құжаттамасы дайындалған. Жобаны жүзеге асыру келесі жылға жоспарланып отыр. Сонымен қатар Мәмбет ауылында жеке тұрғын үй салуға арналған 100 жер учаскесіне инженерлік желілер тартылғанын тілге тиек еткен ауыл тұрғыны енді осы шағын ауданның абаттандырылуы қашан жүзеге асатынын сұрады. Бұл ретте өңір басшысы аталған аумақты абаттандыру жоспарда бар екенін, оған жол салу, көше жарығын орнату және басқа да жұмыстар кіретінін жеткізді. «Koksu S&M Company» ЖШС сүт зауытының директоры кәсіпорынға кәріз жүйесін тарту үшін «Бизнестің жол картасы» бағдарламасы аясында қолдау көрсетуді сұрады. Қазір бұл кәсіпорында 60 адам жұмыс істейді, ал өндірілетін өнім көлемі жылына 1,5 миллиард теңгеге жетеді. Бұған дейін мемлекеттік қолдау арқылы зауытқа газ тартылған болатын. Ал кәріз желілеріне қатысты мәселені егжей-тегжейлі қарау тапсырылды.

Кездесу қорытындысы бойынша тұрғындар қойған барлық сұрақтарға жауаптар мен түсініктемелер берілді.

Атап өтсек, осы күні азаматтар үшін жеке қабылдау өткізілді. Қабылдау барысында тұрғындар негізінен абаттандыру мәселелерін көтерді. Мысалы, Қызылтоған ауылының тұрғыны Лабилданов көшесіне көше жарығын орнату жөнінде өтініш айтса, Балпық би ауылының тұрғындары С. Сейфуллин көшесіндегі №32, 33 үйлердің ауласына балалар ойын алаңын салып беруді және Т. Нүсіпов атындағы шағын аудандағы 1980 жылдары салынған бес қабатты үйдің шатырын жөндеуге қолдау көрсетуді сұрады. Көтерілген мәселелердің шешімі қарастырылатын болады.

Атап өтсек, осы күні облыс әкімі аудан тұрғындарын жеке мәселелері бойынша қабылдады. Сол сияқты өңір басшысы М. Сеңгірбаев атындағы орталық саябақты абаттандыру жоспарымен танысып, ауданға жұмыс істеуге келген мамандарға, соның ішінде дәрігерлер мен педагогтарға күні кеше қолданысқа берілген 20 пәтерлі тұрғын үйге барды. Бұл екі нысан да Балпық би ауылында орналасқан.