Жеңіл атлетика құрамасы әлем чемпионатын сәтсіз аяқтады
Қазақстандық спортшылар Токиода өткен әлем чемпионатында жүлдесіз қалды.
Алматы, NEGE. Соңғы үміт артып шыққан Ясмина Токсанбаева 20 шақырымдық спорттық жүрісте 23-орынға табан тіреді.
20 қыркүйек күні Токиода өткен әйелдер арасындағы 20 км спорттық жүрісте Ясмина Токсанбаева ел намысын қорғады. Ол қашықтықты 1 сағат 31 минут 51 секундта еңсеріп, 23-сатыда мәреге жетті.
Ал чемпион атанған испан спортшысы, екі дүркін Олимпиада чемпионы Мария Перес 1:25:54 уақыт көрсетіп, әлемдік біріншілікте төртінші алтын жүлдесін алды.
- Күміс жүлде – мексикалық Аленья Гонсалеске (1:26:06, Американың жаңа рекорды),
- Қола медаль – жапондық Нанако Фудзиге бұйырды (1:26:18, ел тарихындағы үздік нәтиже).
Бұл чемпионатта Қазақстанды бес спортшы таныстырды. Ең жоғары нәтиже көрсеткен – Нора Джеруто болды. Ол 3000 метрге тосқауылдармен жүгіруде алтыншы орын алды. Дегенмен, жалпыкомандалық есепте ел құрамасы жүлдесіз қалды.