Жанқош Тұраров қарсыласымен көз арбасты
Қазақстандық боксшы Жанқош Тұраров пен Луис Энрике жекпе-жек алдында ресми салмақ өлшеп, көз арбасу рәсімін өткізді, деп хабарлайды ҚазАқпарат тілшісі.
Алматы, NEGE. Ертең мен жеңіс үшін жұдырықтасамын. Көңіл-күй жақсы. Белбеуді өз Отанымда қалдырғым келеді. Ешқандай болжам жоқ. Бұл – спорт, мұнда бәрі болуы мүмкін. Ертеңгі рингтегі кездесу көрсетеді, – деді Жанқош Тұраров баспасөз мәслихатында.
Оның қарсыласы Луис Энрике де Қазақстанға жеңіс үшін жеткенін мәлімдеді. Айта кетейік, испаниялық боксшы Қазақстанға 8 желтоқсан күні ұшып келді.
Еске салайық, 11 желтоқсан күні кәсіпқой бокс шоуының басты жекпе-жегі жеңіліп көрмеген Жанқош Тұраров (25-0, 18 КО) пен азулы Луис Энрике Ромеро (11-5-1, 7 КО) арасында өтеді. Қауіпті әрі аса тартысты болатын бұл айқаста IBO Intercontinental чемпиондық титулы бәске тігілген.
Луис Энрике өзінің DAZN аясында өткен соңғы жекпе-жегінде мықты румындық ринг шеберін нокаутпен жеңіп, әлемдік Boxrec рейтингіндегі ТОП-60 боксшының қатарына кірді.
Кәсіпқой бокс кешін әйгілі DAZN стримингілік сервисі тікелей трансляцияда жаһанның 100 миллион аудиториясына таратпақ. Бұл – ел спорты тарихындағы елеулі оқиғаның бірі әрі беделді спорт платформасының еліміздегі алғашқы эфирі.
Бокс кешінде Елхан Табынбаев (5-0, 3 КО) пен бразилиялық Матэус Да Сильвамен (7-0, 3 КО) жұдырықтасады.
Ангелина Лукас (2-0, 1 KO) осы кеште танзаниялық мінезді қыз Лулу Каягемен (8-8-4, 2 КО) UBO чемпиондық титулын сарапқа салады. Бұл бокс кешінің төрінде Әлихан Төленбаев (2-0, 1 КО) пен Адлан Сельмурзаев (4-0, 3 КО) секілді қылыштай жарқылдаған жастар да өнерін көрсетеді.