Жамбыл облысында жаңа «Алатау» арнайы экономикалық аймағы құрылады
Қазақстан Үкіметі 21 сәуірде «Алатау» индустриялық сауда-логистикалық кешені» арнайы экономикалық аймағын құру туралы қаулы қабылдады.
Астана, NEGE. «Алатау» индустриялық сауда-логистикалық кешені» арнайы экономикалық аймағы Жамбыл облысы Қордай ауданының әкімшілік-аумақтық шекарасы шегінде орналасқан. Аумағы – 165 гектар.
Құжатта арнайы экономикалық аймақты құрудағы негізгі мақсат – инвестиция тарту, жаңа технологияларды енгізу, сондай-ақ халықтың жұмыспен қамтылуын арттыру екені көрсетілген.
Басым бағыттар қатарында өңдеуші өнеркәсіп, соның ішінде химия, мұнай-химия және металлургия салалары, жоғары қосылған құны бар өнім өндірісі, сондай-ақ агроөнеркәсіп кешенін дамыту бар. Бұл ауыл шаруашылығы өнімдерін өңдеуден бастап, сақтау және логистикаға дейінгі толық тізбекті қамтиды.
Сонымен қатар сауда-логистикалық және тарату орталықтарын құру, машина жасау, электротехника және электроника өнеркәсібін дамыту жоспарланған.
АЭА құрамына 100 гектар өндірістік аймақ және 65 гектар сауда-логистикалық аймақ кіреді.
Аймақ аумағында арнайы құқықтық режим енгізіледі, оның ішінде еркін кедендік аймақ рәсімі де қолданылады.
Қаулы қол қойылған күннен бастап күшіне енді.