Жамбыл облысында қатты жел үйлердің шатырын жұлып кетті
6 ақпанда Жамбыл облысы Жаңатас қаласында қатты жел соғып, бірнеше нысанға зақым келген.
Астана, NEGE. Облыстық әкімдіктің хабарлауынша, желдің екпіні 32 м/с-қа дейін жеткен. Салдарынан бірінші, үшінші және төртінші шағын аудандардағы көпқабатты тұрғын үйлердің шатыры ұшып кеткен. Кейбір пәтерлердің терезесі сынып, ағаштар құлаған, автокөліктерге де зақым келген.
Бұдан бөлек, Бейбітшілік көшесінде орналасқан ту тұғыры құлап, аудан аумағында электр жарығы уақытша сөнген.
Әзірге зардап шеккен тұрғындар туралы ақпарат тіркелмеген.
«Оқиғаға байланысты аудан әкімдігінде жедел штаб құрылып, зерделеу және қалпына келтіру жұмыстары жүргізілуде. Қоғамдық-саяси ахуал тұрақты», – делінген әкімдік хабарламасында.
Аймақтағы жағдайды облыс басшысы Ербол Қарашөкеев жеке бақылауына алды.