«Утильсборға жол жоқ» қоғамдық қозғалысының өкілдері митингі өткізбек
Бүгін «Утильсборға жол жоқ» қоғамдық қозғалысының белсенділері баспасөз мәслихатын өткізді. Олар кеше ғана премьер-министдің бірінші орынбасары Роман Склярдың «утиль алымын 50 пайызға түсірдік» деген алдарқату пікірімен келіспейтінін жеткізді.
2019 жылдан бері утиль алымының халықтың қалтасын қағып жатқанын ескеріп, оған қарсы әрекетке көшкен белсенді топ 200 мыңнан астам қол жинаған.
«Біз кәдеге жарату алымы жөніндегі бейінді министрліктердің көптеген шешімдері сараптамасыз және тиісті зерттеулерсіз қабылданғанын білдік. Сондай-ақ, металдарды қайта өңдеумен айналысатын зауыттардың автокөлік құралдары мен ауыл шаруашылығы техникасын кәдеге жаратудың нақты шығындары туралы есептеулерін ұсындық. Бірақ мұны тиісті мекемелер құлағына ілмесе де, жанайқай билікке жетті», – дейді олар.
«Президент утиль алымын тоқтату туралы тапсырма берсе де, 2022 жылғы 23 ақпанда премьер-министрдің бірінші орынбасары Скляр Үкімет атынан автокөлік және ауыл шаруашылығы техникасына қолданыстағы кәдеге жарату алымының ставкасын 50%-ға дейін ғана төмендету жоспарланғаны туралы мәлімдеме жасады. Субсидияланатын өндірістің экономикалық тиімділігін есептеу мен өнеркәсіптік аудит жасау үшін зауытқа блогерлер шақырылады, олардың тексерістерін Скляр «сенімді тексерулер» деп атады», – дейді қоғам белсендісі Нұраддин Садықов.
«Утиль сборға жол жоқ» қозғалысы мынаны талап етеді:
• ауылшаруашылық және арнайы техникаға кәдеге жарату алымын алып тастау;
• автокөліктердің тарифтерін 100 мың теңгеге дейін төмендету;
• Экологиялық кодекстен және өндірушілер мен импорттаушылардың кеңейтілген міндеттемелері қолданылатын тауарлар тізбесінен кабельдік-өткізгіш өнімді алып тастау;
• қаптамаға, электрондық және электр жабдығына және автокомпоненттерге (аккумуляторлар, майлар және т. б.) кәдеге жарату алымының мөлшерлемелерін есептеулер мен РӘТ ұсына отырып қайта қарау;
• 2016 жылдан 2021 жылға дейін «ӨКМ Операторы» ЖШС қызметіне толық аудит жүргізу;
• Қазақстан Республикасы Премьер-Министрінің бірінші орынбасары Р.В.Склярдың отставкаға кетуі;
• Қазақстан Республикасы Индустрия және инфрақұрылымдық даму министрлігінің кәдеге жарату алымының мәселелерімен айналысатын барлық уәкілетті тұлғаларына қатысты тексеру жүргізу.
«Егер талаптар орындалмаса, біз «Қазақстан Республикасының бейбіт жиналыстарды ұйымдастыру және өткізу тәртібі туралы» Заңға сәйкес Қазақстанның барлық өңірлері бойынша митингілер өткізуге өтінімдер беру құқығын пайдаланамыз», – дейді белсенділер.
Нұраддин Садықов, «Утильсборға жол жоқ» қоғамдық қозғалысының өкілі:
«Автопром» үшін неге өзге саланы құрбан етеміз?
– Индустрия жобаларын қаржыландыруға мүмкіндік бар деген бапты өзгерту керек. Скляр: «Біздің негізгі мақсат – жұмыс күшін көбейту. Егер утиль алымын алып тастасақ, көптеген компания жабылып қалады» депті. «Скляр мырза, сіздің осы шешіміңіздің салдарынан логистика, құрылыс, агросектор саласында жүздеген жұмыс орны жабылғанын білесіз бе? Әлде, сіздің міндетіңізге «Автопромды» ғана ілгеру жылжыту кіре ме?
Екінші, ол «Біз «Автопромды» субсидияламаймыз» дейді. Сонда дәл қазір қалыптасқан баға саясаты нені білдіреді? Бізге көлікті шетелден алған тиімді емес пе? Себебі, кей көліктер бағасы екі есе төмен. Үкіметтің индустриялық саясаты басқа арнаға бағытталып барады. Бүкіл сала «Автопромды» қолдан жемдеудің тиімсіз екенін көрсетіп келеді. Неге «Автопром» үшін өзге саланы құрбан етеміз?
Санжар Боқаев, саясаттанушы:
Скляр – Назарбаев отбасы схемасының басты лоббиі
– Сарапшылар Роман Склярдың индустрия министрі қызметін атқарған кезеңіндегі құжаттарды қарады. Кезінде министр болған Жеңіс Қасымбек осы құжаттарға қол қойған жоқ. Ал осы лауазымды қызметке келе салып, араға бір апта салып Скляр қабылдап жіберді.
Бұл – шетелдік компаниялардың, соның ішінде ресейлік арнайы және ауылшаруашылық техникаларды жасаушылардың мүддесін үнемі қолдап келе жатқан адам. Мұндай лобби жасауға заңмен тыйым салынған. Мемлекеттік қызметшінің жеке компанияларға немесе адамға қатысты қандай да бір басымдықты жүзеге асыруға құқығы жоқ.
Скляр – Назарбаев отбасы схемасының басты лоббиі. Бұған дейін бұл қызметті бұрынғы премьер-министр Асқар Мамин атқарған. Екі жыл ішінде Маминнің, Бейбіт Атамқұловтың жұмысы көз алдымызда болды. Олар кетсе де, орынбасарлары қалып, сол қызметті атқарып отыр. Яғни Назарбаев отбасының схемасы бұзылған жоқ. Бірінші – Әлия Назарбаева, екінші – Мамин, үшінші – Скляр, төртінші – Мағзұм Мырзағалиев, бесінші Бейбіт Атамқұлов және Лаврентьев, осы алтауы жауап беруі тиіс.
Біздің автопромға мемлекетік қолдау ретінде 2,5 млрд доллар бөлінген. Осы ақшаға елімізде жылына 750 мың көлік құрастыратын 5 зауыт салуға болады. Салық төлеушілердің қалтасынан түскен миллиард ақша қайда кетті? Біздің ұстанымымыз – жеңіл автокөлікке утилалымды барлық сарапшылар есептегендей 100 мың теңгеден асырмау. Ал ауыл шаруашылығы техникасы, кабельдік-өткізгіш өнімдер үшін мүлдем алым алынбауы қажет, сондықтан біз жақын күндері активтерімізбен бірге өңірлер бойынша жұмыс жүргізіп, митингілер ұйымдастуға өтінім береміз.
Владимир Ким, кабельдік-өткізгіш өнім саласындағы кәсіпкер:
Утиль алымы – жемқорлық шара
– Утиль алымы – жемқорлық шара. Кешегі 50 пайыз жеңілдік те сараптамадан өтпеді. Ол кәдімгі базардағы» 50 пайыз саған да, маған да жоқ» деген сауда сияқты. «Кәсіпкерлік туралы» кодекстің 83 және 194-баптары бұзылды. Склярдың осы салада жүріп «Автопромнан» басқаның мүддесін ойлағанын көрген емеспін. Ол неге қуаңшылық кезде қарапайым шаруалардың жағдайына алаңдамады? Оның басында бір ғана нәрсе бар, ол – екі олигарх Смағұлов пен Лаврентьевтің мүддесін қорғау. Скляр орнын босатып, істеген істері бойынша жауап беруі тиіс.
P.S. Сонымен, «Утильсборға жол жоқ» қоғамдық қозғалысы үкіметтің шешімімен келіспей, митингі өткіземіз деп отыр. Ал билік белсенділердің талаптарына құлақ аса ма?
