«Ұлттық қор – балаларға»: Қаржы шотқа қашан түседі?
БЖЗҚ мәліметінше, балаларға арналған қаражат шотқа осы жылдың 1 ақпанынан кешіктірілмей аударылады.
Астана, NEGE. Бірыңғай жинақтаушы зейнетақы қоры «Ұлттық қор – балаларға» бағдарламасы бойынша ақпарат жариялады.
«2008 жылы туған адамдарға нысаналы жинақтау шоттарына нысаналы жинақтарды есептеу 2026 жылғы 1 ақпаннан кешіктірмей іске асырылады, олар 18 жасқа толғанда Қазақстан Республикасының заңнамасында белгіленген тәртіппен нысаналы мақсат бойынша пайдалануы мүмкін», – делінген хабарламада.
Қор дерегінше, бір балаға арналған сома балалар санына және Ұлттық Банктен алынған ақпаратқа негізделе отырып есептеледі.
Қазақстан Республикасының азаматы болып саналатын барлық бала «Ұлттық қор – балаларға» бағдарламасына енгізілген.
«2026 жылы 18 жасқа толатын балалар (бала әлі 18 жасқа толмаған жылы) аударылған нысаналы талаптарын өздерінің БЖЗҚ-да ашылған нысаналы жинақтау шоттарына есептелетін нысаналы жинақтар түрінде алады», – дейді БЖЗҚ өкілдері.
Айта кетейік, баланың «Ұлттық қор – балаларға» бағдарламасына қатысушы ретінде тіркелген-тіркелмегенін БЖЗҚ-ның kids.enpf.kz сайтындағы «Қатысушыны іздеу» бөліміне баланың ЖСН енгізіп, «Тексеру» батырмасын басу арқылы тексеруге болады.
