Ұлыбританияда Temu «салық төлеуден жалтарды» деген күдікке ілінді
Ұлыбританияда Temu екі жыл бойы корпоративтік салық төлеуден жалтарған болуы мүмкін деген күдік бар, бұл ретте компанияның кірісі «өте жоғары» болған. Мұндай ақпаратты Retail Gazette басылымы жариялады.
Алматы, NEGE. БАҚ пен әділ салық төлеуді қадағалайтын Fair Tax Foundation ұйымының назарын Ұлыбританияның Тіркеу палатасы ұсынған деректер аударған. Оған сәйкес, Temu-ды Ұлыбританияда ұсынатын Whaleco компаниясының пайдасы 2023 жылы $32 млн болса, 2024 жылы $63,3 млн-ға дейін өскен. Салыққа дейінгі табыс та екі есеге жуық көбейген: $2 млн-нан $3,9 млн-ға дейін. Алайда Whaleco төлеген корпоративтік салық көлемі бұл өсімге сәйкес емес. Компания 2024 жылы $985 мың салық төлеген, бұл 2023 жылғы $517 мыңнан аз ғана көп.
Ұлыбританиядағы Temu өкілдері бұл жағдайды «валюталық шығындармен» түсіндіріп, өздерінің шығыны $7,9 млн-нан $8,7 млн-ға өскенін алға тартты.
Алайда Fair Tax Foundation ұйымының басшысы Пол Монаган мұндай түсіндіруге қанағаттанбады. Оның пікірінше, Temu Ұлыбритания нарығын пайдаланып, байып жатыр, бірақ тиісті салық төлеуден жалтарып отыр.
«Temu-дың Ұлыбритания экономикасы мен салық жүйесіне неге осыншама аз үлес қосатыны туралы маңызды сұрақтар қою қажет. Соңғы екі жыл бойы оның сауда қызметінен корпоративтік салық түскенін көріп отырған жоқпыз. Лондонда тіркелген Temu кеңсесі — іс жүзінде ешқандай қызметкері де, ұзақ мерзімді активтері де жоқ жай ғана формалдық мекенжай», — деді Пол Монаган.
Айта кетейік, Қазақстанда да ірі қытайлық маркетплейстердің салықтан жалтаруы талқыланған. Мәжіліс депутаты Азат Перуашевтың айтуынша, бажсыз әкелінетін тауарлар есебінен қытайлық ритейлерлер қазақстандық кәсіпкерлерге қарағанда әлдеқайда аз салық төлейді. Бұл бизнес жүргізуге тең емес жағдай туғызып, отандық кәсіпкерлердің шетелдік алыптармен әділ бәсекелесуіне кедергі келтіреді.
«Шетелдік маркетплейстер құны 200 еуроға дейінгі сәлемдемелерді бажсыз әкелу құқығын пайдаланып отыр. 2023 жылы олар Қазақстанға 505 млрд теңгеге тауар жеткізіп, бюджетке 24 млрд теңге ғана төледі. Бұл айналымның небәрі 4,8%-ы. Бұл кедендік төлемдерден толық босату және 2,5 есе аз ҚҚС. Шетелдік маркетплейстердің ҚҚС төлеуден жалтаруы салдарынан бюджет 60 млрд теңгеден астам қаржы жоғалтты», — деген еді депутат.
