Түркістан облысында сауда инфрақұрылымын жаңартуға 3,4 млрд теңге тартылды
Түркістан облысында мемлекеттік қолдау аясында сауда инфрақұрылымын дамытуға 3,4 млрд теңге бағытталды. Бұл туралы Сауда және интеграция министрлігі хабарлады.
Алматы, NEGE. Жыл басынан бері өңір кәсіпкерлері «Даму» қоры арқылы екінші деңгейлі банктерден несие алып, 50 сауда нысанын жаңғыртуға, жаңа базарлар салуға, құрал-жабдық алуға және айналым қаражатын толықтыруға мүмкіндік алған. Бағдарламаға сәйкес, несиенің 10,75 пайыздық мөлшерлемесін мемлекет субсидиялайды.
Жетісайлық кәсіпкер Ануарбек Балғабаев мемлекеттік қолдау есебінен 700 орындық заманауи базар құрылысын жүргізіп жатыр. 3,42 гектар аумақта бой көтерген Grand Park Zhetisay базары заманауи талаптарға сай жабдықталған: мұнда автотұрақ, өрт қауіпсіздігі жүйелері, желдеткіш орнатылған.
ҚР Сауда және интеграция министрлігі 2029 жылға қарай заманауи сауда форматының үлесін 70 пайызға жеткізуді жоспарлап отыр. Қазір бұл көрсеткіш 41 пайызды құрайды. Жыл соңына дейін ел бойынша 100 базар жаңғыртылмақ, оның сегізі Түркістан облысында орналасқан.
Аймақтағы бірқатар базарларда құрылыс жұмыстары қарқынды жүріп жатыр:Түркістандағы «Қуаныш» базарында қақпа автоматтандырылды, жабық автотұрақ салынды. «Жауғашты» базарында қойма құрылысы аяқталды. «Яссы» және «Алтын бұлақ» базарларында өрт дабыл жүйелері орнатылуда. Сарыағаштағы «Дәулет» және Қазығұрттағы «Ешанқұл-ата» базарларында жаңғырту жұмыстарының 80%-ы аяқталған.
— «Базарларды жаңғырту – бизнестің әлеуметтік жауапкершілігі. Бұл тек қауіпсіздік емес, сонымен бірге салық түсімдерінің ашықтығын арттырып, көлеңкелі экономиканы азайтуға жол ашады», – деді Сауда комитеті төрағасының орынбасары Ернұр Жәутікбаев.
