Тұңғышбай ЖАМАНҚҰЛОВ: Арыстанбекті АЛЛАҒА тапсырдым!
Бұрынғы Мәдениет және спорт министрі Арыстанбек МҰХАМЕДИҰЛЫНА қатысты сот процесі басталды. Тағылған айыпқа қарағанда, ол Ұлттық музейді басқарып тұрған кезде халықаралық көрмелерді өткізуге бөлінген 111 млн теңгені жымқырған.
Алғашқы сот процесінен кейін А.Мұхамедиұлының адвокаты Мұстақым ТӨЛЕЕВ: «Өздеріңіз білесіздер, Тұңғышбай Жаманқұлов әл-Тарази деген азамат бар. Сол көпе-көрнеу жалған ақпарат таратып, менің қорғауымдағы Арыстанбек Мұхамедиұлынан кек алу мақсатында жалған деректерді алға тартып, прокуратураға арызданған. Соның негізінде заңсыз қылмыстық іс қозғалып, тергеп-тексерілді.
Бұл істің саяси астары жоқ, тек кек алу мақсаты. Кезінде Тұңғышбай Жаманқұлов қылмыстық жауапкершілікке ұшырап, сотталды. Ол бұған «Арыстанбек Мұхамедиұлы себеп» деп ойлаған. Сондықтан бумеранг ретінде сондай арыз жазып отыр», – деді.
NEGE тілшісі Тұңғышбай ЖАМАНҚҰЛОВҚА хабарласып, А.Мұхамедиұлынан кек алу мақсатының болған-болмағанын сұрады.
– Арыстанбек Мұхамедиұлына қатысты сот процесі басталғанынан хабардар боларсыз?
– Иә, не болыпты енді?
– А.Мұхамедиұлының адвокаты сізді «кек алу мақсатында прокурорға арызданды» деп айыптады. Бұған не дейсіз?
– Кезінде оның өзі алдап, сан соқтырып кеткен адамдар үшбу арыз жазып, маған әкеп берді. Мен соларды прокуратураға апарып бердім, бар болғаны осы. Ол адамдар енді барлығын біледі ғой. Не ұрлап, не қойып жатқанының бәрін өз көздерімен көрген.
– Ол арыз иелерін атай аласыз ба?
– Жоқ. Мынаның арамдығын біледі, сондықтан ертең қастандық жасатуы мүмкін.
– Мұхамедиұлының үстінен өз атыңыздан арыз жаздыңыз ба?
– Жоқ, мен бар болғаны басқалардың арызын жеткізіп бердім.
– Шынымен кек алғыңыз келді ме?
– Жоқ, мен баяғыда оған деген өкпе-ренішті ұмытқанмын. Оны Аллаға тапсырдым. Оның үстіне менің жағдайым басқа ғой...
– Мұхамедиұлымен қатар айыпталып жатқан «Экспонат» компаниясының директоры Азамат КӨШЕНОВ сотқа сізді шақыруды сұрады. Қатысуға әзірсіз бе?
– Мен сотқа қатыспаймын. Себебі іске еш қатысым жоқ. Ол ұрлау жөнінде болып жатқан сот, сондықтан оған қатысы бар адамдардан сұрасын.
– Адвокаттың айтуынша, А.Мұхамедиұлын денсаулығы мәз емес екен. Соттан оны үйқамаққа жіберуді сұрап еді, сот оны мақұлдамады...
– Сап-сау, күліп-ойнап жүр ғой. Соған қарағанда біразын сатып алған-ау, шамасы, себебі тағылған соманың мөлшері азайып қалыпты. Сот мұқият қарап, заң бойынша тиісті жазасын береді ғой.
– Арыз иелері не айтар екен?
– Арызды тапсырған мен екенімді жоққа шығармаймын, бірақ қалғандары әзірге үндемей отыр, қажет болған кезде шығады. Бұдан басқа айтарым жоқ.
