Төсек қатынасының нашарлағаны – басқа аурулардың есік қағып тұрғаны
Неміс ғалымдары: «жыныстық қатынас пен денсаулық арасындағы байланысқа медицина аз назар аударып отыр» деп дабыл қақты. Бұл туралы неміс басылымы
Süddeutsche Zeitung хабарлады.
Алматы, NEGE. Гамбург-Эппендорфтың университет клиникасының сексологтары сексуальды белсенділік, қанағаттану және денсаулық туралы мәліметтер жинаған. Зерттеу жұмыстары барысында жастардың төсек қатынасы аз түсетіні дәлелденіп отыр. Ал 36-45 жастағы еркектер мен 26-35 жастағы әйелдер белсенділік көрсеткен. «Тәжірибе көрсеткендей, сексуальды белсенділік қанағаттанудың көрсеткіші болып табылмайды екен. Жыныстық қатынасқа көп түсетін жалғыз басты адамдар отбасылы немесе тұрақты серігі бар адамдарға қарағанда төсектегі өміріне көңілдері толмайды.
Еркектердің үштен бірі және әйелдердің 45 пайызы төсек қатынасында түйткілдерге кезігеді екен. Атап айтқанда, төсек қалауы әлсіреген, эрекциясы бәсең, ләззат алудан қалған, тіпті ауырсыну сезінеді.
«Төсек қатынасының адам денсаулығына пайдасы дәрігерлерге бұрыннан белгілі. Тән мен жан аурулары адамдарды төсектен қағады. Бірақ дәрігерлер кеңес бергенде секс тақырыбы әлі күнге дейін табу болып отыр», – дейді ғалымдар.
Неміс дәрігерлерінің айтуынша, төсек қатынасының нашарлауы жүрек-қан тамыр ауруларының, қант диабетінің, неврологиялық және басқа да дерттердің белгісі болуы мүмкін. Сондықтан дәрігерлер бұл тақырыпқа баса назар аударғаны жөн екен.