Тоқаев: Қитұрқы саяси ойындармен әуестеніп кеткен кәсіпкерлерді сынауға тура келді
Мемлекет басшысы Қасым-Жомарт Тоқаев Turkistan басылымына берген көлемді сұхбатында ірі бизнес өкілдері, олардың қоғамның наразылығын тудырып жататын өмір салтына қатысты пікірін білдіріп, бизнесмендер ел экономикасын өркендету үшін жұмыс істеуі керек екенін айтты.
Астана, NEGE. Журналист Президенттен «Бизнес өкілдері қалталы азаматтардың да, қарапайым адамдардың да қамын ойлап өмір сүруді қашан үйренеді?» деп сұрады.
Мемлекет басшысы бизнестің кез келген ел экономикасының негізгі тірегі екенін айтып, жекеменшік институтына ешкім қол сұқпауы тиіс екенін атап өтті.
Президент Швейцарияда жұмыс істеп жүргенде аса ірі әрі белгілі кәсіпкерлермен кездескенде олардың өз қаражатын өте үнемдеп жұмсайтынын және елден дараланып көзге түскісі келмейтінін көріп, таңғалғанын жеткізді.
«Миллиардтаған қаржысы бар адамдар қонақүйдің қарапайым бір бөлмесінде тұруға намыстанбайды. Жеке ұшақпен ұшпақ түгілі, бірінші санаттағы орындарға да отырмайды. Бірақ бұл – олардың бойында ғасырлар бойы қалыптасқан дағды.
Ал біздің кәсіпкерлеріміз үшін қалыпты көрінетін өмір салты кейде қоғамның наразылығын тудырып жатады. Мұндай жағдай көптеген елде бар. Сол үшін де қайырымдылық қызметі жұмыс істейді. Бұл – қоғам мен бизнес арасындағы өзара келісім іспеттес», – дейді Қасым-Жомарт Тоқаев сұхбатында.
Осы тұста сұхбат алушы басылымның бас редакторы Бауыржан Бабажанұлы Республика күніне орай азаматтарды мемлекеттік наградалармен марапаттау рәсімінен кейін Президенттің кәсіпкерлермен жеке кездескенін еске салып, сол жиында не айтылғанын сұрады.
Қасым-Жомарт Тоқаев қоғам игілігіне қызмет ету билік жүктеген міндет емес, мәртебелі парыз екенін еске салғанын айтты. Сондай-ақ ол шетелде табысқа жетсе де, туған елін ұмытпай, халқына қолдау көрсетіп жүрген ірі кәсіпкерлерді жақсы үлгі ретінде атап өтті.
Президенттің айтуынша, кәсіпкерлердің бәрі бірдей мемлекеттің қолдауын дұрыс түсіне бермейді, әрдайым солай болуға тиіс деп қабылдайды.
«Олар ауқымды жобаларды бастап алып, қит етсе Үкіметтен көмек сұрайды. Мен оларға "бизнеспен айналысып жатқан сіздер ме, әлде Үкімет пе?" деп сұрақ қойдым.
Қитұрқы саяси ойындармен әуестеніп кеткен кейбір кәсіпкерлерді сынауға тура келді. Бизнесмендер ел экономикасын өркендету үшін жұмыс істеуі керек. Тіпті, кәсіптің жілігін шағып, майын ішкен Илон Масктің өзі саясатқа белсенді араласпау туралы шешім қабылдады.
Отандық бизнес өкілдері тарихымызда бұрын-соңды болмаған алапат тасқын кезінде елдік істен шет қалған жоқ, апат салдарын жоюға қаржылай көмек көрсетті. Бұл – қуанарлық жағдай», – дейді Қасым-Жомарт Тоқаев.
Осы ретте мемлекет басшысы қайырымдылықпен айналысып жүрген азаматтарды қолдау үшін арнайы «Мейірім» орденін енгізгенін атап өтті. Елге жанашырлық көрсетіп, әлеуметтік жауапкершілік танытқан кәсіпкерлер биылдан бастап осы жоғары наградаға ие болады.
