Тоқаев Қауіпсіздік кеңесінің отырысын өткізді
Отырыста Қазақстан Республикасының 2026-2030 жылдарға арналған ұлттық қауіпсіздік стратегиясының жобасы қаралды, деп хабарлайды Ақорда. Бұл стратегия алдағы бес жылда болуы ықтимал сын-қатерлерге төтеп берудің негізгі тәсілдерін анықтайды.
Астана, NEGE. Президент Қасым-Жомарт Тоқаевтың төрағалығымен Қазақстан Республикасының 2021-2025 жылдарға арналған ұлттық қауіпсіздік стратегиясын іске асыру қорытындысы шығарылды. Жиында Мемлекет басшысы Үкімет пен бірқатар салалық мемлекеттік орган жетекшілерінің басты бағыттар бойынша баяндамасын тыңдады.
«Мемлекет басшысы геосаяси ахуалды ескере отырып, қоғамдық, экономикалық, экологиялық, су және азық-түлік қауіпсіздігі мәселелерін пысықтау қажеттігіне назар аударды», – делінген Ақорда хабарламасында.
Қасым-Жомарт Тоқаев жаңа Конституцияны қабылдау арқылы Қазақстанның Тәуелсіздігін, егемендігі мен аумақтық тұтастығын сенімді түрде қорғауға мүмкіндік туғанын атап өтті.
Сондай-ақ Мемлекет басшысы қорғаныс қабілетін қамтамасыз ету; азаматтарды, қоршаған ортаны және ақпараттық кеңістікті қорғау деңгейін арттыру; киберқауіпсіздік шараларын күшейту және әлеуметтік-экономикалық салалардағы тәуекелдерді азайту мәселелеріне тоқталып өтті.
Қасым-Жомарт Тоқаев экономика, білім мен технология салаларында сұранысқа ие білікті шетелдік мамандарды тартуға қолайлы жағдай жасайтын бағдарламаны жеделдетіп әзірлеуді тапсырды.