Тоқаев боксшы Дина Исламбекова мен Надежда Рябецті жеңісімен құттықтады
Мемлекет басшысы Қасым-Жомарт Тоқаев Дина Исламбекова мен Надежда Рябецті бокстан Азия чемпионы атануымен құттықтады.
Астана, NEGE. Бұл жөнінде Президенттің баспасөз хатшысы Айбек Смадияров мәлімдеді.
«Мемлекет басшысы боксшы қыздардың асқан шеберлігі, жеңіске деген ерік-жігері мен отаншылдық сезімі жанкүйерлерді тәнті еткенін атап өтті. Президент ұлттық құрама мүшелеріне алдағы әлем чемпионаттары мен Лос-Анджелес Олимпиадасында биіктен көрінуіне тілектестік білдірді», – делінген хабарламада.
Айта кетейік, Моңғолия астанасы Ұланбатырда өткен ересектер арасындағы Азия чемпионаты финалында Дина Исламбекова Үндістан өкілі Алфия Пазанмен жұдырықтасты. Қорытынды есеп: 5:0. Ал 80 келідегі Надежда Рябец шешуші кезеңде Өзбекстан спортшысы Рухшона Парпиевамен шықты. Надежда шеберлік жағынан айқын басымдық танытты. Нәтижесінде төрешілер жеңісті бірауыздан жерлесімізге берді.
Жалпы байрақты бәсекеде Елдос Сайдалин баптайтын әйелдер құрамасы 2 алтын, 1 күміс, 2 қола медаль еншіледі.