Тоқаев: Әскерде әлімжеттікке, бұзақылыққа, рушылдыққа, жершілдікке орын жоқ
Мемлекет басшысы Қасым-Жомарт Тоқаев Turkistan басылымына берген сұхбатында армиядағы қазіргі ахуалға тоқталып өтті.
Астана, NEGE. Президент әскери борышын өтеуге шақырылған сарбаздардың жарақат алуы мен қаза болуына қатысты оқиғаларды өркениетті елге жат, теріс үрдіс деп санайтынын жеткізді. Оның пікірінше, бейбіт заманда мұндай жайттар болмауға тиіс.
Бұл ретте Қасым -Жомарт Тоқаев барлық күштік құрылым басшыларымен жуырда өткен кеңесте қорғаныс саласына жауапты мекеменің басшылығын тәрбие жұмысын дұрыс қадағаламай отырғаны үшін сынға алғанын атап өтті.
«Армия жастарға қолдау көрсетіп, оларды Қазақстанның нағыз азаматы ретінде тәрбиелеп шығаруы керек. Командирлер әскери қызметшілерге үлгі-өнеге болуға тиіс. Әскерде әлімжеттікке, бұзақылыққа, рушылдыққа, жершілдікке орын жоқ, ондай жайттарға жол берілмейді. Мұның бәрін өзім жеке қадағалап отырамын. Мен ахуалды түзеу үшін шұғыл шаралар қабылдау жөнінде бұйрық бердім», – дейді Қасым-Жомарт Тоқаев.
Мемлекет басшысының айтуынша, қайғылы оқиғалар әскери бөлімшелердің бәрінде бірдей болып жатқан жоқ.Тексеру жұмыстары, жалпы, әскердегі тәртіп қатаң сақталатынын көрсеткен.
Бұл ретте Президент шындыққа сәйкес келмейтін ақпарат таратанын блогерлерді сынға алды.
«Танымалдыққа ұмтылған кейбір блогерлер әскердегі шынайы ахуалға мүлдем жанаспайтын сөз таратып жүр. Олар армияны сарбаздар күн сайын дерлік қылмыскерлердің құрбанына айналып, қаза табатын жер ретінде көрсеткісі келеді», – дейді Мемлекет басшысы.
Оның пікірінше, сарбаз болу – өзіңді дамыту үшін тың мүмкіндіктерге ие болу. Әскери борышын өтеп қайтқан жастар жоғары оқу орындары мен колледждерде тегін оқи алады. Олар әскерде жүргенде сұранысқа ие мамандықтарды меңгереді. Ал келісімшартпен жұмыс істейтін әскери қызметшілер мен офицерлер әлеуметтік жағынан барынша қорғалған.
«Армияда темірдей тәртіп болуға тиіс. Сарбаздар ант бергенде айтатын "Әскери қызметтің ауыртпалықтары мен қиыншылықтарын табандылықпен көтеремін" деген сөзден әскери өмірдің қатаңдығын айқын аңғаруға болады.
Әскери қызметтің абырой-беделін көтеру және еліміздің қорғаныс қабілетін арттыру – мемлекеттің басты басымдығының бірі», – деп мәлімдеді Президент.
Қасым-Жомарт Тоқаев сұхбатында Қазақстанның Қарулы күштерін технологиялық жаңғырту жұмысы қарқынды жүргізіле бастағанын баса айтты. Оның сөзінше, былтыр Ұлы Жеңістің 80 жылдығына орай өткізілген әскери шеруді шетелдік саясаткерлер мен әскери қайраткерлер жоғары бағалаған, бұл іс-шара армияны заманауи қару-жарақпен және техникамен, соның ішінде Қазақстанда жасалған өнімдермен толық жабдықталғанын, сондай-ақ, әскери қызметшілердің дайындығы өте жақсы екенін айқын көрсеткен.
«Әскери бөлімшелеріміз ел ішіндегі және халықаралық деңгейдегі жаттығуларда тамаша нәтижеге жетіп жүр. Қазақстанда колледждерден бастап университетке дейінгі білім және ғылым мекемелерін түгел қамтитын ұлттық әскери мектеп қалыптасты», – дейді Тоқаев.
Мемлекет басшысы жуырда Тараздағы мамандандырылған әскери мектепке аты аңызға айналған батыр Бауыржан Момышұлының есімін беру туралы шешім қабылдағанын атап өтті. Президент облыс орталығының бәрінде осындай мектеп ашу туралы тапсырма берген.
Қасым-Жомарт Тоқаев мұндай білім мекемелерінде Қазақстан халқы мақтан тұтатын сардарлар мен генералдар тәрбиеленіп шығатынына сенімді.
