TikTok арқылы диван сатпақ болған әйел 2,5 жылға сотталды
Жамбыл облысының тұрғыны TikTok желісін пайдаланып, алаяқтық жасады деген айыппен 2 жыл 6 айға бас бостандығынан айырылды.
Астана, NEGE. «Алаяқтық» бабы бойынша қозғалған қылмыстық іс Жамбыл аудандық сотында қаралған.
Тергеу мәліметіне сәйкес, биыл сәуір айында айыпталушы әйел өзін сатушы ретінде көрсете отырып, TikTok желісінде жиһаз сататыны туралы хабарландыру жариялаған. Жәбірленуші акция бойынша 60 мың теңгеге сатылып жатқан диванға қызығушылық танытып, хабарландыруда көрсетілген телефон нөміріне хабарласқан.
Өзін сатушы ретінде таныстырған әйел диванға алдын ала төлем жасау қажет екенін айтып, сатып алушыны 25 мың теңгені басқа біреудің шотына аударуға көндірген. Ақшаны алғаннан кейін уәде етілген жиһаз жеткізілмей, сатушы да хабар-ошарсыз кеткен. Алданып қалғанын түсінген әйел оның үстінен полицияға шағымданған.
«Кінәлінің іс-әрекеті тараптар мен куәлердің айғақтарымен, банк чектерімен, шот үзінділерімен және істің өзге де материалдарымен дәлелденді», – делінген сот хабарламасында.
Сондай-ақ сотта сотталушының бұрын алаяқтық жасағаны үшін бірнеше рет қылмыстық жауапкершілікке тартылғаны анықталған. Ол жазасын өтеу кезеңінде тиісті нәтиже шығармай, тағы да қылмыс жасаған.
Сотталушы кінәсін толық мойындап, істеген ісіне өкініш білдіріп, келтірілген залалды өз еркімен өтеген. Жәбірленуші материалдық зиянның өтелгенін растап, заңға сәйкес жаза тағайындауды сұраған.
Сот үкімімен А. Қылмыстық кодекстің 190-бабы 2-бөлігінің 4) тармағы бойынша кінәлі деп танылып, оған 2 жыл 6 айға бас бостандығынан айыру жазасы кесілді.
Үкім заңды күшіне енді.