Теңге НЕГЕ коронавирустан қорықпады?
"Коронавирус әлемдік экономиканы жалмап, теңгені құлатады" деген пессимист сарапшылардың айтқаны келе қоймады. Сондықтан доллардың 400 теңге болуы фантастика деп білеміз. Оған Ұлттық Банк өткізген кей операцияларының да әсері бар.
Теңге иммунитеті
Коронавирус мұнай бағасына ауыз салғаннан кейін сарапшылардың басты назары қор биржасына ауған болатын. Кеше инвесторлардың біразы "қашты" деген сыбыс шығып, теңге тағдырына алаңдаушылық та байқалды. Бірақ биржа тыныш. Біздің басты назарымыз USD/KZT жұбында болған. Ол іс жүзінде 0,2 пайызға ғана өсіп, вирусқа деген иммунитетін байқатты. Тіпті Ресей рублі 1,2 пайызға құлдыраған болатын. Теңге неге тым тұрақты?
Біріншіден, Tengenomika авторлары нарық факторын еске салады . KASEде теңгенің өтімділігі жоғары болды. Бұған жыл басынан бері бір күндік репо операциялары бойынша TONIA ставкасының максималды өсуі тіркелді. Ол қазір тіпті базалық ставкадан да асып кетіп, 9,30%ды құрап отыр.
TONIA мөлшерлемесінің соңғы бірнеше күнде артуы Ұлттық Банк ноталары көлемінің 300 миллиард теңгеге өсуімен қатар жүріп отырды. Демек, белгісіз ойыншы Ұлттық Банк ноталары түріндегі теңгеге және қысқа мерзімді теңгелік активтерге асқан қызығушылық танытуда. Кездейсоқтық деп ойлайсыз ба?
Екіншіден, RUB/KZT-нің кросс-бағамы бірден 6.13-тен 6.05-ке дейін төмендеді. Бұл 1,3 пайыздық құлау және өткен жылдың 9 желтоқсанынан бері мұндай төмендеу тіркелмеген еді. Демек, теңгенің бағамын ұстап тұруына Ұлттық Банктің себепкер екенін түрлі факторлардан байқауға болады.
Тақырыпқа орай: Коронавирус пен Қазақстан экономикасы. Температурамыз қандай?
Егер екінші нұсқамыз шындыққа жанасса, онда осы аптаның қалған сауда күндерінде біз USD/KZT жұбының 383-ке, ал рубльдің 6.13-6.15-ке дейін өсуін байқай аламыз. Негізі коронавирус ашуына мінсе, теңгені 389-ға дейін құнсыздандыра алады. Ал Ұлттық Банк ашуланса, теңгені қайтадан өз орнына қойып қоюға қауқарлы. Бірақ, жеке өзіміз, ұлттық валютаның нарық заңымен реттелгенін әлдеқайда дұрыс деп санаймыз.
