Шымкенттің әкімі кімге не дәлелдегісі келді?
Сыбайлас жемқорлыққа қарсы іс-қимыл агенттігі өкілі Шымкентте жиналыс үстінде ұсталған шенеунікке қатысты пікір білдірді.
ҚР Сыбайлас жемқорлыққа қарсы іс-қимыл агенттігі Превенция қызметінің басшысы Саян Ахметжанов бүгін Мәжілісте «Шымкент әкімдігіндегі отырыс кезінде шенеунікті ұстаудың бастамашысы әкімнің өзі болды» деп мәлімдеді.
– Бұл мәселені біз қарастырдық. Сыбайлас жемқорлыққа қарсы іс-қимыл агенттігі барлық жерде ашық және қолжетімді жұмыс істейді. Кез келген шақырту келісіледі. Бұл – жергілікті атқарушы органның басшылығымен бірге, яғни әкімнің және аумақтық органның шешімі. Бұл облыс әкімінің бастамасы болуы керек, – деді Саян Ахметжанов.
Еске сала кетейік, 5 ақпанда Сыбайлас жемқорлыққа қарсы іс-қимыл агенттігі Шымкентте әкімдік отырысы болып жатқан кезде тура жиын үстінен Тұрғын үй басқармасы басшысының міндетін атқарушыны ұстап әкеткен видео жариялаған.
Сыбайлас жемқорлыққа қарсы іс-қимыл агенттігінің мәліметінше, ұсталған азамат «қаладағы 216 тұрғынүйдің сейсмикалық тұрақтылығын технологиялық тексеру жұмыстарына бөлінген аса ірі мөлшердегі бюджет қаражатын ұрлады» деп күдікке ілінген. Шығын көлемі – 120 млн теңге.
Қарамағындағы шендіні жиналыс үстінде ұстатып жіберген Шымкент қаласының әкімі кімге не дәлелдегісі келді екен?