Шымкентте жоғарғы сынып оқушысы өзінен кіші баланы тепкілеп кеткен
Шымкент қалалық полициясы кішкентай балаға әлімжеттік көрсеткен жасөспірім ұсталғанын хабарлады.
Астана, NEGE. Бұған дейін желіде жасөспірімнің өзінен бірнеше жасқа кіші баланы тепкілеп жатқан бейнежазбасы тараған еді.
«Бейнежазбада көрсетілгендер көрші тұратын 10-сынып және 5-сынып оқушылары екені анықталды. Оқиғаның барлық қатысушылары ата-аналарымен бірге полицияға жеткізілді», – делінген полиция хабарламасында.
Оқиғаға дейін екі баланың арасында жанжал туындаған. Осыдан кейін 10-сынып оқушысы көршісін көшеде кездестіріп, күш көрсеткен.
Бұл жайт бойынша полиция қылмыстық іс қозғады. Кәмелетке толмаған жасөспірімнің ата-анасы баланы тәрбиелеу жөніндегі міндеттерін тиісінше орындамағаны үшін жауапкершілікке тартылды. Материалдар кәмелетке толмағандар істері жөніндегі комиссияға жолданды.