Шымкентте мүгедектігі бар әйел туыстарының кесірінен баспанасыз қалған
Шымкентте сот ІІ топтағы мүгедектігі бар әйелдің атынан рәсімделген сенімхаттар мен жылжымайтын мүлікті сатып алу-сату шарттарын жарамсыз деп таныды. Нәтижесінде оның үйі, жер учаскесі және пәтеріне қатысты құқықтары қалпына келтірілді.
Астана, NEGE. Жоғарғы соттың мәліметінше, Шымкент тұрғыны сотқа жүгініп, өзіне тиесілі тұрғын үй, жер учаскесі және пәтерге қатысты берілген сенімхаттар мен сатып алу-сату шарттарын жарамсыз деп тануды талап етті.
Әйел сенімхаттарға қашан және қандай жағдайда қол қойғаны есінде жоқ екенін айтқан. Оның сөзінше, ол өз мүлкін сатуға немесе басқа адамдардың иелігіне беруге келісім бермеген. Сенімхаттар рәсімделіп, мәмілелер жасалған кезде өзі облыстық психикалық денсаулық орталығында стационарлық ем қабылдап жүрген.
Іс бойынша екі нотариус пен әйелдің үш туысы жауапкер ретінде танылды. Талап қоюшы олардың өзінің психикалық жағдайын пайдаланып, қажетті құжаттарды сыртынан рәсімдегенін мәлімдеді. Кейін сол сенімхаттардың негізінде оған тиесілі жер учаскесі, тұрғын үй мен пәтер сатылып кеткен.
Шымкент қаласының ауданаралық азаматтық істер жөніндегі соты жауапкерлердің сенімхаттарды алғаннан кейін әйелдің атынан әрекет етіп, оның жылжымайтын мүлкіне билік еткенін анықтады. Соның салдарынан ол баспанасынан айырылып, туыстарының үйінде тұруға мәжбүр болған.
Сот-психиатриялық сараптама әйелдің 2019 жылдан бері психикалық аурумен ауыратынын растады. Сарапшылардың қорытындысына сәйкес, ол сенімхаттарға қол қойған кезде өз әрекеттерінің мәнін түсінбеген және оларды басқара алмаған.
Оның ойлау қабілеті, жады, эмоциялық тұрақтылығы мен зияткерлік функцияларының айқын бұзылғаны анықталды.
Сот жиналған дәлелдерді зерттей келе, сенімхаттар рәсімделген кезде әйел өз еркін саналы түрде білдіре алмаған деген қорытындыға келді. Осыған байланысты сенімхаттар мен олардың негізінде жасалған сатып алу-сату шарттары жарамсыз деп танылды.
Сот шешімі заңды күшіне енді.