Шымкентте 12 сыныптас әскери борышын бір бөлімде өтеп жүр
Шымкенттегі 6506 әскери бөлімінде бір сыныпты оқыған 12 түлек Отан алдындағы борышын қатар өтеп жүр. Олар Алматы облысы Жамбыл ауданындағы Үмбетәлі Кәрібаев атындағы орта мектепті бірге тәмамдаған.
Астана, NEGE. Ұлттық ұлан өкілдері мұны тосын жайт ретінде атап өтеді. Өйткені бір ауданнан бір әскери бөлімге түсудің өзі сирек кездесетін жағдай екен.
Қатардағы жауынгер Расул Саутовтың айтуынша, сыныптастар бір әскери бөлімге бөлгенде таңғалған. Ал қатардағы жауынгер Марат Бейбарыс жігіттер бір-бірін мектептегідей қолдайтынын, мұндай бірлік әскери өмірге тезірек бейімделуге көмектесетінін айтады.
«Мұндай мысалдар сирек кездеседі, бірақ дәл осы оқиғалар патриотизм мен жауынгерлік бауырластық мектеп табалдырығынан басталатынын айқын көрсетеді. Бүгінгі таңда осы жігіттер бірлік, өзара қолдау және Отанға адалдықтың лайықты үлгісі болып отыр.
Қазіргі уақытта жігіттер оқу пунктінде бастапқы әскери дайындықтан өтіп, әскери қызметтің негіздерін меңгеруде. Командирлер олардың ұйымшылдығы мен бір-біріне көмек көрсетуін жоғары бағалайды», – делінген Ұлттық ұланның желідегі парақшасында жарияланған жазбада.
24 қаңтарда мерзімді әскери қызметтегі жауынгерлер әскери ант қабылдайды, одан кейін сарбаздар Шымкент қаласында қоғамдық тәртіпті сақтау қызметіне кіріседі.
