Шерзат Полаттың өліміне қатысты апелляциялық сот шешімі ертең жарияланады
Алматы облыстық сотында Шерзат Полаттың өліміне қатысты айыпталған 8 сотталушыға қатысты апелляциялық сот отырысы өтті.
Алматы, NEGE. Сегіз сотталушы апелляциялық шағым түсірген. Сот барлық тараптарды тыңдады. Шешім 19 тамыз күні таңғы сағат 10:00-де шығады.
Сот отырысы түске дейін журналистердің қатысуынсыз өтті. БАҚ өкілдеріне бөлек бөлмеде онлайн трансляция ұйымдастырылған. Алайда трансляцияның даусы дұрыс естілмей, тоқтатылды. Журналистер сот отырысын телефоннан тыңдады.
Сонымен қатар сотқа айыпталушылардың өзі қатыстырылмады.
Журналистер сот залына тек түстен кейін ғана кіре алды, бірақ фото-видео түсіруге рұқсат берілмеді. Тек жәбірленуші тараптың адвокаттары ғана өздерін фото-видеоға түсіруге рұқсат етті.
Шерзат Полаттың отбасы сот үкімін өзгеріссіз қалдыруды сұрап отыр. Адвокат Мейірман Шекеев олардың 5 маусымдағы айыптау үкімін өзгеріссіз қалдыруды талап ететінін мәлімдеді.