Шерзат Болаттың өліміне қатысты сот наурыз айында басталуы мүмкін
Бұл туралы адвокат Саида Тәуекелева айтты.
Алматы, NEGE. Адвокаттың сөзінше, қазіргі уақытта тараптар іс материалдарымен танысып жатыр.
Олар оны зерттеп болған соң соттың қашан басталатыны анықталмақ.
«Қазір қылмыстық іс материалдарын алып, танысып жатырмыз. Яғни қазір барлық тараптар материалдарды зерттеуге кірісуде. Танысып болғаннан кейін сот қашан басталатыны белгілі болады. Менің болжамым бойынша, шамамен наурыздың ортасына қарай сот істері басталуы мүмкін. Себебі қылмыстық іске қатысушылар өте көп», - деді адвокат.
Естеріңізге сала кетейік, 2024 жылы 4 қазанда Талғарда 16 жастағы Шерзат Болат кісі қолынан қаза тапты. Өткен жылдың желтоқсан айында оның ағасы Нұрғанат Ғайыпбаевтың денесі бейіт маңынан табылған болатын. Алдын ала болжам бойынша ол өз-өзіне қол жұмсаған. Сонымен қатар Шерзат Болаттың әкесі Қаржаубай Нұрымов 15 тәулікке қамалды.