Шерзат Болаттың өліміне қатысты қылмыстық іс осы аптада сотқа түседі
Қазақстан Республикасы Ішкі істер министрінің орынбасары Санжар Әділов 16 жастағы Шерзат Болаттың өліміне қатысты қылмыстық іс жақын күндері сотқа берілетінін хабарлады.
Алматы, NEGE. «Шерзат Болаттың өліміне қатысты қылмыстық істі прокуратура тексеріп жатыр. Алдағы күндері, осы аптаның ішінде сотқа беріледі деп күтіп отырмыз. Басты сот талқылауын жүргізу үшін судья тағайындалады. Алдағы уақытта бұл жөнінде соттың өзі түсініктеме берсе, сауаттырақ болады деп ойлаймын», – деді Санжар Әділов.
Қазіргі уақытта Шерзат Болаттың өліміне қатысты қылмыстық істің көлемі 62 томнан тұрады. Оның ішінде барлық жиналған дәлелдемелер, сараптама қорытындылары, жауап алу хаттамалары және басқа да маңызды материалдар бар.
Естеріңізге сала кетейік, 2024 жылы 4 қазанда Талғарда 16 жастағы Шерзат Болат кісі қолынан қаза тапты. Өткен жылдың желтоқсан айында оның ағасы Нұрғанат Ғайыпбаевтың денесі бейіт маңынан табылған болатын. Алдын ала болжам бойынша ол өз-өзіне қол жұмсаған.