«Шаршап кеттім»: Еркебұлан Тоқтар жеңілістен кейін үзіліс алатынын айтты
Қазақстандық спортшы Еркебұлан Тоқтар Арменияның Ереван қаласында өткен Hype Fighting Asia турнирінде өнер көрсетіп, қырғызстандық Марсель Нұрланбек уулынан жеңілді.
Астана, NEGE. Жеңіл салмақта өткен кездесу ММА қолғаптарымен бокс ережесі бойынша ұйымдастырылып, төрешілердің бірауыздан шығарған шешімімен Қырғызстан спортшысының жеңісімен аяқталды.
Жекпе-жектен кейін спортшы өзінің шаршағанын мойындап, үзіліс алатынын айтты.
«Құрметті жанкүйерлерім, төмен қаратып қойғаным үшін ренжімеңдер. Хейтерлерім, күліп алыңыздар, мұндай күн жиі бола бермейді. Соңғы рет 3 жыл бұрын жеңілген едім.
Демалыс керек сияқты. Қанша уақыт екенін білмеймін: бәлкім, 3–4 ай, жарты жыл… Шаршап кеттім. Бірақ ораламын», – деп ағынан жарылды ол.
Еркебұлан Тоқтардың аралас жекпе-жектегі (ММА) кәсіби мансабына келсек, қазіргі таңда оның рекорды – 11 жеңіс, 3 жеңіліс.