«Сексист» профессор жұмыстан қуылды
Гумилев атындағы Еуразиялық Ұлттық университеттің профессоры Ерлан Сүлейменов әйелдерге қатысты «сексисттік» пікірі үшін жұмыстан қуылды.
Нұр-Сұлтан, NEGE. Е.Сүлейменов әлеуметтік желіде «Ұлттық сенім кеңесінде неге әйелдер аз?» деген сауал тастаған Әсия Ермұхамбетоваға жауап берем деп басы бәлеге қалды.
«Қанша орын қажет болса, сонша әйел отыр. Әйел жынысы пайда болғалы бері өзінің аяғы ауырлығын да зерттей алмаған», – деген профессор әйелдерді ұру керек екенін айтып, өзінің исламист, трайбалист, әсіреұлтшыл екенін мойындаған. Сондай-ақ жиһадты, гомофобия мен жидофобияны қолдайтынын айтқан.
Этика жөніндегі комиссия профессордың пікірін адамгершілік нормаларға қайшы деп тауып, ректордың бұйрығы бойынша Сүлейменовпен жасалған келісімшарт тоқтатылды.
