Саят Медеуов жаңа қызметке тағайындалды
ҚР еңбек сіңірген қайраткері, әнші Саят Медеуов еңбек жолын Сарыөзек ауылында жалғастырады.
Алматы, NEGE. Өнер иесі Кербұлақ ауданындағы «Күреңбел» фольклорлық-этнографиялық ансамблінің жетекшісі болып тағайындалды. Кәсіби әншінің жаңа қызметі туралы Кербұлақ ауданының әкімі Махаббат Бигелдиев Facebook-тегі парақшасында мәлімдеді.
«Бүгін Кербұлақ ауданының мәдениет саласында қуанышты күн болды. Қазақстан Республикасының еңбек сіңірген қайраткері, белгілі сахна саңлағы Саят Медеуов ауданымызда құрылған «Күреңбел» фольклорлық-энтографиялық ән-би ансамблінің жетекшісі болып тағайындалды. Саят Қабылұлының өнердегі және өмірдегі жинаған іс-тәжірибесі ауданымыздың өнерпаздарының кәсіби деңгейінің өсуіне зор ықпал тигізеді деген сенімдемін! Саят Қабылұлына іске сәт дегім келеді», - деп жазды аудан әкімі.
Айта кетейік, 2017 жылы Саят Медеуов Алматы облысы Қарасай ауданының №14 округіне Мәслихат депутаты болып сайланған еді. Ендеше, өнер иесін жаңа қызметімен құттықтаймыз!