Samruk-Kazyna Construction еншілес компаниясын 228,8 млн теңгеге сатпақ
Samruk-Kazyna Construction «Самұрық-Қазына Девелопмент» ЖШС-дегі 100 пайыз үлесін сатуға шығарды. Активтің бастапқы бағасы – 228,8 млн теңге. Сауда 17 маусымға жоспарланған.
Астана, NEGE. «Самұрық-Қазына Девелопмент» ЖШС 2013 жылғы 20 наурызда құрылған. Компания «Жасыл квартал» жобасын іске асыру үшін ашылған. 2019 жылы серіктестік қызмет аясын кеңейтіп, инжинирингтік қызмет көрсетуге, оның ішінде техникалық қадағалау мен жобаларды басқаруға аккредитация алған.
Бағалау есебіне сәйкес, 2026 жылғы 28 ақпанда компанияның ақша қаражаты мен оның баламалары 1,858 млрд теңге болған. Құжатта бұл қаражат кассада немесе банктік шоттарда сақталғаны және компанияның ең өтімді активі екені көрсетілген.
Құжатқа сүйенсек, қаражат міндеттемелерді өтеуге және дивиденд төлеуге жұмсалмақ. Мұндай шешімді «Самұрық-Қазына Девелопмент» ЖШС-нің бақылау кеңесі 2026 жылғы 4 наурызда қабылдаған.
Есепте компания балансының басқа да көрсеткіштері келтірілген. Қысқа мерзімді дебиторлық берешек 44,2 млн теңгені, ал қысқа мерзімді кредиторлық берешек 7,1 млн теңге құрады.