Салық реформасы: Арнайы режимдер азайып, талаптар өзгерді
Мемлекет басшысы Салық кодексіне қол қойғаннан кейін елімізде жаңа нормаларды түсіндіру жұмысы басталды. Алғашқы ашық кездесу 18 шілдеде «Атамекен» ҰКП алаңында өтті, деп хабарлайды Үкіметтің баспасөз қызметі.
АЛМАТЫ, NEGE. Премьер-министрдің орынбасары, ұлттық экономика министрі Серік Жұманғарин мен «Атамекен» ҰКП Президиумының төрағасы Райымбек Баталов бизнес қауымдастық өкілдерімен офлайн және онлайн форматта кездесті. Семинар барысында мемлекеттік органдар өкілдері жаңа Салық кодексіндегі негізгі өзгерістерді таныстырды.
Арнайы салық режимдері үшке қысқарды
Ұлттық экономика министрлігінің Салық және кеден саясаты департаментінің директоры Ерлан Сағынаевтың айтуынша, жаңа құжатта арнайы салық режимдерінің саны 7-ден 3-ке дейін азайған:
Өзін-өзі жұмыспен қамтығандар үшін;
Жеңілдетілген декларация негізіндегі режим;
Шаруа немесе фермер қожалықтарына арналған режим.
Мысалы, өзін-өзі жұмыспен қамтығандар (яғни жалдамалы қызметкерлері жоқ, кәсіпкер ретінде тіркелмеген тұлғалар) табысы айына 300 АЕК-тен аспаса, жаңа режимді қолдана алады. Олар жеке табыс салығынан (ЖТС) босатылады, тек табысының 4%-ын әлеуметтік төлем ретінде төлейді.
Жеңілдетілген декларация режимінде ҚҚС пен әлеуметтік салық төленбейді. Бұл режимді табысы жылына 600 мың АЕК-тен (шамамен 2,4 млрд теңге) аспайтын және қызмет түрі тыйым салынбаған кәсіпкерлер пайдалана алады.
Шаруа қожалықтары үшін бұрынғы режим сақталады. Бірақ бірыңғай жер салығы алынып тасталады, енді олар жалпы табысының 0,5%-ын ЖТС ретінде БСК-ға төлеуі тиіс. Сонымен қатар, пайдаланылмай жатқан немесе заңсыз қолданылып жатқан ауыл шаруашылығы жерлеріне салынатын салық мөлшері 20-40 есеге дейін артты.
Салық әкімшілендіру оңайлатылады
Ерлан Сағынаев салық жүйесін басқаруда да жаңа тәсілдер енгізілетінін айтты:
- Салық түрлері 20%-ға қысқарады;
- Есептілік 30%-ға азаяды;
- Салықтық жеңілдіктер оңтайландырылады.
Бұдан былай салық берешегі аз болса, бизнестің барлық қызметін бұғаттау шарасы қолданылмайды. Мысалы:
- Қарыз 20 АЕК-ке дейін болса, тек ескерту жіберіледі;
- 20–45 АЕК аралығында болса – банк шотынан шығатын операциялар уақытша тоқтатылады;
- 45 АЕК-тен жоғары болса – мүлік саудаға шығарылуы мүмкін.
Сондай-ақ берешек борышкердің дебиторлық қарызы есебінен өндіріледі.
Бизнес өкілдері қандай ұсыныс айтты?
Қоғамдық тамақтандыру ұйымының өкілі Вероника Даугалиева жеңілдетілген декларациямен жұмыс істейтін кәсіпкерлердің шығынын корпоративтік табыс салығы (КТС) шегеріміне жатқызуға рұқсат беруді ұсынды.
Ал Қазақстан құрылыс салушылары қауымдастығының өкілі Виктор Микрюков заңды тұлғаларды жарамсыз деп тану тәжірибесіне алаңдап, мәжбүрлі түрде жоюдың толық рәсімін енгізуді сұрады.
Кездесу барысында қатысушылар мемлекеттік орган өкілдерінен өз сұрақтарына толық жауап алды. Жаңа Салық кодексін түсіндіру жұмыстары енді еліміздің басқа өңірлерінде жалғасады.
