Прокуратура айыппұл арқалаған блогерді неге марапаттағанын түсіндірді

Астана, NEGE. Блогердің есімі бұған дейін онлайн ұтыстарға байланысты дау аясында аталған. Ресми мәліметке сәйкес, 2025 жылғы 4 желтоқсанда ҚР Туризм және спорт министрлігінің Ойын бизнесі мен лотереяны реттеу комитеті оған 589 800 теңге көлемінде айыппұл салған. Ал ертесіне инфлюенсер әлеуметтік желіде Прокуратура күніне орай Бас прокуратурадан алғыс хат алғанын хабарлап, фотосын жариялады.

Осы жағдайға байланысты әлеуметтік желі қолданушылары «айыппұл арқалаған блогерді марапаттау қаншалықты орынды?» деген мәселе көтерді.

Көпшіліктің талқысына түскен марапатқа қатысты Зарина Нұржанова өз ұстанымын білдірді. Ол алдымен «ақпаратты нақтыламай, теріс пікір қалыптастырған» пабликтерге өкпесін айтып, құмар ойындарға еш қатысы жоқ екенін мәлімдеді. Ол ойын бизнесіне емес, тек парфюм сататын адамға жарнамалық қызмет көрсеткенін айтты.

«Мен парфюм сататын адамға жарнамалық қызмет көрсеттім. Бұл істің барлығы таза әрі ашық өткеніне сенемін. Әсіресе тікелей эфирде болғанын ескерсек, мұнда күмән тудыратын ештеңе жоқ деп ойлаймын. Комитет мені Астанаға шақырғанда, дәл қазір барып, түсініктеме жазуға физикалық мүмкіндігім жоқ екенін айттым. Сол себепті айыппұлдың толық сомасын жарнама беруші өз мойнына алып, өзі төледі. Мұны ерекше атап өткім келеді. Өйткені бұл құқық бұзушылыққа менің еш қатысым жоқ. Қазірдің өзінде сотқа жүгініп, қатысым жоқтығын дәлелдеуге толық мүмкіндігім бар. “Ойын үшін жазаланды” деген әңгіме шындыққа жанаспайды», – деді ол.

Прокуратураның Nege.kz тілшісіне блогерді марапаттау туралы шешім оған қатысты әкімшілік хаттама рәсімделмей тұрып қабылданғанын хабарлады.

«Блогер Зарина Нұржановаға 2025 жылғы 4 желтоқсанда Туризм және спорт министрлігінің Ойын бизнесін және лотереяны реттеу комитеті тарапынан қысқартылған тәртіппен әкімшілік құқық бұзушылық туралы хаттама толтырылған. Ал марапаттау туралы шешім бұдан бұрын – 27 қарашада қала прокуратурасының басшылық құрамының талқылауымен қабылданды», – делінген ведомство өкілдерінің жауабында.

Прокуратураның мәліметінше, Зарина Нұржанова жол-көлік оқиғаларының алдын алу және жол қозғалысы қауіпсіздігін сақтау тақырыбындағы арнайы видео түсіріліміне қатысқан. Аталған видео әлеуметтік желілерде шамамен 1 миллионға жуық қаралым жинап, көрермендер тарапынан оң бағаланған. Осы еңбегі ескеріліп, оны марапаттау туралы шешім қабылданған.

Бұған дейін Зарина Нұржанова марқұм әкесінің прокуратура қызметкері болғанын айтқан еді. Осыған байланысты желіде бұл жайт оның марапатталуына қаншалықты әсер етті деген мәселе де көтерілді. Алайда блогердің айтуынша, марапат тек өз еңбегінің нәтижесі.

«Бас прокуратурадан алғыс хатты мен өз еңбегім үшін алдым. Заң мен Тәртіп тақырыбын насихаттап, видео түсіріп, ол видео республика бойынша ең көп қаралым алғаны үшін мені марапаттады. Менің марқұм әкем прокуратураның бұрынғы қызметкері, бірақ бұл марапатқа оның еш қатысы жоқ», – деді блогер.

Шымкент қаласының прокуратурасы да Зарина Нұржанованың әкесінің бұл марапатқа еш қатысы жоқ екенін ресми түрде мәлімдеді.

Зарина Нұржановаға қоса, профилактикалық жұмыстарға белсенді қатысқан 50-ден астам азаматқа алғыс хат табысталған.