Премьер-лига: «Қайрат» жаңа маусымды жеңіспен бастады

Алматы, NEGE. Бүгін футболдан Премьер-лига командалары арасындағы Қазақстан біріншілігі бірінші турының екінші ойын күні өтті. Алматының «Қайраты» өз алаңында «Ақтөбе» командасын қабылдады. Бірінші кезеңде есеп ашылған жоқ. Екінші кезеңде алматылық шабуылшы Хосе Канте 67-минутта пенальтиден есеп ашса, 83-минутта тағы бір мәрте мергендік танытты. Осылайша «Қайрат» қарсыласынан 2:0 есебімен басым түсті. Жаңа маусымды жеңіспен бастап, турнир кестесінде көш басына шықты.

Еске салсақ, 5 наурызда алғашқы турдың шымылдығын ашқан «Ордабасы» (Шымкент) - «Мақтарал» (Түркістан облысы) командалары арасындағы ойында 1:1 есебі тіркелді. Ал «Астана» (Нұр-Сұлтан) мен «Шахтер» (Қарағанды), «Атырау» мен «Ақсу» (Павлодар облысы), «Тұран» (Түркістан) мен «Тараз» ойындарында командалар 0:0 есебіне қанағат білдірді. Сондай-ақ, «Каспий» (Ақтау) мен «Қызылжар» (Петропавл) кездесуінде ақтаулық клуб 1:0 есебімен басым түсті. Дәл қазір «Тобыл» (Қостанай) мен «Ақжайық» (Орал) кездесуінің бірінші кезеңі аяқталды. Әзірге есеп - 0:0. Енді екінші тур ойындары 10 және 11 наурыз күндері өткізіледі.