Премьер-министр әкімдерге жылу желілеріндегі жөндеу жұмыстарының аяқталуын қатаң бақылауды тапсырды
Үкімет отырысында Премьер-министр Олжас Бектенов жылыту маусымының басталуына қатысты мәселеге арнайы тоқталды.
Алматы, NEGE. Павлодарда жылу беріле бастады.
Республикадағы жағдай туралы Премьер-министрдің орынбасары Роман Скляр баяндады. Оның мәліметінше, энергия көздері қоймаларындағы көмір қоры 4,8 млн тонна көмірді құрайды, бұл былтырғы деңгейден 6%-ға артық, ал мазут деңгейі 128,5 мың тоннаны құрап отыр, бұл өткен жылғы деңгейден 30% жоғары. Алдағы жылыту маусымына халықтың және коммуналдық сектордың көмірге қажеттілігі 7,7 млн тонна көмірді құрайды. Өңірлерде 4,2 млн тонна немесе 55%-ы дайындалды. Жалпы, жаңа жылыту маусымына білім беру нысандарының 100%-ы, денсаулық сақтау объектілерінің 96%-ы, тұрғын үйлердің 91%-ы, автономды қазандықтардың 93%-дан астамы дайын.
Бұл ретте, Роман Склярдың айтуынша, Степногорск, Орал, Жітіқара, Петропавл және Аягөз және Сәтбаев қалаларындағы жылу желілері бойынша жұмыстардың мерзімінде аяқталмау қаупі бар.
Премьер-министр әкімдерге жөндеу жұмыстарының аяқталуын қатаң бақылауға алуды тапсырды және олар келесі Үкімет отырысына дейін орындалуы тиіс.
«Баяндамада айтылғандай, бірқатар өңірде жұмыстар кешігіп жатыр. Осыған орай Ақмола, Батыс Қазақстан, Абай және Ұлытау облыстары әкімдеріне жөндеу жұмыстарының аяқталуын қатаң бақылауға алуды тапсырамын. Келесі отырысқа дейін аяқтаңыздар. Жұмыстың сапасы басты назарда болуға тиіс. Тапсырма орындалмаса, тиісті шешімдер қабылданады. Бұл – барлық өңірге қатысты мәселе. Жылу беру маусымын уақтылы бастау қажет»,
— деп атап өтті Олжас Бектенов.
