Полицейлердің заңсыз әрекетін әшкерелеген депутатты кафе маңында кастетпен ұрып кеткен
2024 жылғы 13 мамыр күні кешке Тараз қаласында Алматы облысы Іле ауданының мәслихат депутаты, заңгер Нұрлан Байғазиевті белгісіз адам ұрып кетті.
Алматы, NEGE. Ол бет сүйектерінің көптеген сынуымен ауруханаға жеткізілді, жақын күндері операция жасалуы тиіс.
Оқиға сағат 18:00 шамасында Жамбыл облыстық полиция департаментінің жанындағы «Ғибрат» кафесінің маңында болған. Алдын ала мәлімет бойынша, депутат қызметтік іссапармен келген, клиенттерімен заңгер ретінде кездесіп жатқан. Шабуылдаушы кастет қолданған деген болжам бар. Қазіргі уақытта шабуылдың себебі белгісіз, полиция мен дәрігерлерден ресми пікір әзірге берілмеген.
Айта кетейік, сәуір айында Нұрлан Байғазиев Instagram парақшасында видео жариялаған еді. Онда полиция қызметкерлері аялдамада тоқтап, қызметтік көліктен түспей, 17 жастағы қызбен сөйлесіп тұрғаны көрсетілген. Депутат оқиға орнына барып, инспекторлармен және кәмелетке толмаған қызбен әңгімелескен. Қыздың айтуынша, полицейлер оны Саяхатқа дейін апаруды ұсынған, бірақ бір полицей бұл мәліметті жоққа шығарған.
Видео жарияланғаннан кейін бір қызметкер жұмыстан босатылып, екіншісі қызметінен уақытша шеттетілген.
