Павлодар облысында 13 сәуірден бастап карантин жарияланады
Ертіс өңірінде 13 сәуірден бастап карантин жарияланады. Бұл туралы Павлодар облысының бас санитарлық дәрігері қаулы етті.
Алматы, NEGE. Құжатта көрсетілген негізгі талаптарға орай ерекше жағдайда жұмыс істейтін азаматтарды қоспағанда, өзгелерге қала-аудандардың аумағына кіріп-шығуға тыйым салынады. Облыстағы елді мекендердегі карантиндік аумақтар бақылауға алынып, теміржол және автовокзалдардың жұмысы уақытша тоқтайды. Сонымен қатар білім беру мекемелері, екінші деңгейлі банктердің жұмысы тоқтайды.
Тамақ өнімдері мен дәрі-дәрмек саудаланатын нысандардың жұмыс режимі таңғы 9:00-ден 20:00-ге дейін шектеледі. Сондай-ақ азаматтар тұрғылықты жерден тыс аумақта жүргенде маска кию режимін сақтауы керек. Әзірге карантин мерзімі қашанға дейін ұзаратыны белгісіз. Карантин басталғанға дейін жергілікті атқарушы билік түсіндіру жұмыстарын да жүргізеді. Еске салсақ, облыста коронавирустық инфекция жұқтырудың 9 дерегі тіркелді. Бір оқиға өліммен аяқталды. Ал бір азамат аурудан айықты.