Парламент депутаттары каникулдан оралды
VIII шақырылымдағы Парламенттің төртінші сессиясы ашылды.
Астана, NEGE. Палаталардың бірлескен отырысында VIII шақырылымдағы Қазақстан Республикасы Парламентінің төртінші сессиясының ашылуы өтті.
– Өздеріңіз білесіздер, осы күндері Мемлекет басшысы Қасым-Жомарт Кемелұлы Тоқаевтың Қытай Халық Республикасында ресми сапары өтіп жатыр. Осыған байланысты ҚР Парламенті және оның депутаттарының мәртебесі туралы Конституциялық заңының 6-бабының 5-ші тармағына сәйкес, маған Парламент Мәжілісінің Төрағасы ретінде ҚР Президентінің тапсырмасы бойынша сегізінші сайланған ҚР Парламентінің төртінші сессиясын ашық деп жариялауға рұқсат етіңіздер, – деді Мәжіліс спикері Ерлан Қошанов.
Іс-шараға Парламенттің қос палатасының спикерлері мен депутаттары, Премьер-Министр мен Үкімет мүшелері, Мемлекеттік кеңесші, Конституциялық сот пен Жоғарғы сот төрағалары, Президент Әкімшілігінің, сондай-ақ басқа да мемлекеттік органдардың басшылығы қатысты.