Пәкістандағы су тасқыны: қаза тапқандар саны 330-ға жетті
Пәкістанның солтүстігінде толассыз жауған жаңбыр салдарынан болған су тасқыны мен опырылыс жүздеген адамның өмірін қиды. Қаза тапқандар саны 330-ға жеткені хабарланды.
Алматы, NEGE. Geo News дерегінше, құтқарушылар бір тәулік ішінде су тасқыны мен көшкіннен қираған үйлердің астынан көптеген адамның мәйітін тапқан.
Өңірлер бойынша ең ауыр жағдай Хайбер-Пахтунхва провинциясында тіркелді – мұнда 307 адам қаза тапты. Гилгит-Балтистанда – 12, ал Азад-Кашмирде 11 адамның өлімі расталды. Сонымен бірге, Хайбер-Пахтунхва билігі 32 адамның із-түзсіз жоғалғанын хабарлады.
Мамандардың айтуынша, нөсер жауын 21 тамызға дейін жалғасуы мүмкін.
Пәкістан премьер-министрі Шахбаз Шариф төтенше жағдай аймағына дәрі-дәрмек, азық-түлік және басқа да қажетті көмекті шұғыл жеткізуді тапсырды.