Өзбекстан Қазақстанмен арадағы шекараны уақытша жапты
Әуе қатынасы тоқтатылмайды. Алайда Өзбекстанға келетін адамдар ПТР-тестің теріс нәтижесін көрсетуге міндетті
Алматы, NEGE. Өзбекстан 15 қаңтардан бастап Қазақстанмен арадағы мемлекеттік шекарадан өтуді уақытша тоқтатты, деп хабарлайды елдің сыртқы істер министрлігі.
«Аталған шаралар Өзбекстанға коронавирустың жаңа штамы – «Омикронды» кіргізбеу үшін қолға алынып отыр» делінген ресми хабарламада. Әуе қатынасы тоқтатылмайды. Алайда Өзбекстанға келетін адамдар ПТР-тестің теріс нәтижесін көрсетуге міндетті.
Анықтама, кем дегенде, 48 сағат бұрын алынуы шарт. Бұдан бөлек, коронавирустық инфекцияны анықтауға арналған экспресс-антиген тестті тапсыру қажет.
Дегенмен, кейбір адамдар автокөлікпен мемлекеттік шекарадан өте алады.Олар:
елге оралатын Қазақстан және Өзбекстан азаматтары;
үкіметаралық фельдъегерлік байланыс мамандары;
халықаралық жүк тасымалын жасайтын жүргізушілер;
ресми (үкіметтік) делегациялардың құрамында жүрген адамдар;
дипломатиялық өкілдіктер, консулдық мекемелер және халықаралық ұйымдардың қызметкерлері, сондай-ақ, олардың отбасы мүшелері;
Қазақстан аумағында орналасқан Өзбекстанның нысандарына қызмет көрсететін мамандар, сондай-ақ, Өзбекстан аумағында орналасқан Қазақстанның нысандарына қызмет көрсететін мамандар;
инвестициялық жобалар аясында қызмет атқарып жүрген азаматтар;
Өзбекстанда тұрақты түрде тұратын Қазақстан азаматтары және Қазақстанда тұрақты түрде тұратын Өзбекстан азаматтары;
емделуге баратындар, ауырып жатқан жақын туыстарына баратындар және жақын туыстарын жерлеуге шыққандар;
марқұмдардың денесін алып келе жатқандар.