Нұрлан Әлімжанов бастық болды
Естеріңізде болса, Nege.kz порталында
«Нұрлан Әлімжанов Нұр-Сұлтан әкімдігінен жұмыс сұрап жүр» деген мақала жарияланып, оған экс-депутат шамданып қалған. Мақала жарияланғаннан кейін редакцияға өзін «Әлімжановтың тікелей менеджерімін» деп таныстырған Динара Оразбаевадан ашулы хат келді.
- Тақырыпқа орай: «Нұрланның жолы». Экс-депутат НЕГЕ өкпелі?
Менеджерінің айтуынша, Нұрлан Әлімжанов Нұр-Сұлтан қалалық әкімдігіне жұмыс сұрап барған жоқ, әкімдік оны өздері шақырған. Тілшіміз оқиғаның мән-жайын анықтау мақсатында Нұр-Сұлтан қаласының әкімдігіне ресми сауал жолдаған болатын. Хатымызға жауап көп ұзамай қолымызға тиді.
Нұр-Сұлтан қаласы әкімінің аппаратының хабарлауынша, әкімдік Нұрлан Әлімжановты шақырмаған. Сонымен қатар, актермен жеке кездесу де ұйымдастырылмаған болып шықты.
Есесіне, Нұрлан Әлімжановтың бүгіннен бастап Нұр-Сұлтан қаласы Мәдениет басқармасының басшысы лауазымына тағайындалғаны белгілі болды.
«Н. Әлімжанов «Қазақстан Республикасының мемлекеттік қызметі туралы» ҚР Заңының 16-бабына сәйкес және Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігі Төрағасының «Б» корпусының мемлекеттік әкімшілік лауазымына орналасуға арналған конкурсты өткізу қағидалары негізінде өткізілген конкурс нәтижесінде «Нұр-Сұлтан қаласының Мәдениет басқармасы» ММ басшысы лауазымына ағымдағы жылы 19 наурызда арнайы тексерудің нәтижелерін алған күнге дейін жұмысқа қабылданды», – делінген ресми жауапта.
Айта кетейік, Нұр-Сұлтан қаласы Мәдениет басқармасының бұрынғы басшысы Нұрлан Сыдықов пара алды деген күдікпен ұсталған болатын. Сот Сыдықовты кінәлі деп тауып, 5 жылға бас бостандығынан айырған.
Енді міне, конкурстық іріктеулер нәтижесінде Мәдениет басқармасынан істі болып кеткен Нұрланның орнына тағы бір Нұрлан бастық болып келді. Экс-депутаттың өкпесі енді басылатын шығар...