Нұрдәулет Қилыбай МАЭК-тегі жағдайға қатысты нақты тапсырмалар берді
Бүгін, 17 шілде күні Маңғыстау облысының әкімі Нұрдәулет Қилыбай «МАЭК» кешенінде орналасқан жылу электр станциясына барып, апаттық жағдайды жою бойынша нақты тапсырма берді.
Алматы, NEGE. Соңғы апта ішінде жабдықтардың тозуы салдарынан үшінші энергоблок екі рет қатарынан істен шықты. Нәтижесінде Ақтауда электр қуатын өндіруде уақытша іркіліс орын алды.
Қазір күрделі жөндеуден шыққан екінші энергоблок сынақ режимінде іске қосылып, кешке дейін толық қуатта жұмысқа қосылады деп күтілуде. Бұл өндіріс секторындағы уақытша шектеулерді жоюға мүмкіндік береді. Қала тұрғындары үшін электр қуаты бойынша ешқандай шектеу енгізілген жоқ.
«МАЭК» ЖШС Бас директоры Кеңес Орақовтың айтуынша, қазіргі таңда станция электр жүйесіне жалпы 357 МВт береді. Үшінші энергоблоктағы ақауға байланысты ТЭС-2 толық жүктемеде жұмыс істеуде.
«Энергоблоктың температурасын 160 градусқа дейін төмендетпей, құрылғыны ашып, техникалық тексеру жүргізу мүмкін емес. Бұл үдеріс 2–3 күнге дейін созылады. Бүгінде үшінші энергоблок суыту кезеңінде. Қазіргі уақытта екінші энергоблок күрделі жөндеуден шығып, сынақ режимінде іске қосылды. Кешке дейін ол толық қуатта жұмыс істей бастайды. Нәтижесінде өндіріс секторындағы шектеулердің жойылуы күтілуде», – деді Кеңес Орақов.
Аймақ басшысы Нұрдәулет Қилыбайдың айтуынша, МАЭК-тің үш энергоблогын толықтай жаңғырту жоспары бар. Қазіргі таңда жобалық-сметалық құжаттама әзірлену үстінде.
«Ақтау қаласындағы электр желілерінің 66%-ы жерасты жүйесінде орналасқан және олардың көпшілігі кеңестік кезеңде салынған. Жалпы ұзындығы 75 шақырымға жуық желі күрделі жөндеуді қажет етеді. Бұл бағытта нақты шаралар қабылданып жатыр. Қажетті материалдарды сатып алуға жергілікті бюджеттен қаражат бөлінді. Алайда арнайы кабельдер мен сымдар шетелден, негізінен шетелден жеткізіледі. Бұл – белгілі бір уақытты талап етеді. Дегенмен, материалдар жеткізіле салысымен, жұмысқа бірден кірісеміз», – деді Нұрдәулет Қилыбай.
