Нығматулинге тиесілі болған «Сарыарқа НАН» зауыты жұмысын тоқтатады
Ерлан Нығматулинге тиесілі болған «Сарыарқа НАН» зауыты 2025 жылдың 15 желтоқсанынан бастап өнім шығаруды тоқтатады.
Астана, NEGE. Мұндай шешімді акционерлер өндіріс көлемінің азаюына байланысты қабылдаған. Қазір зауыт өзінің жобалық қуатының тек үштен біріне ғана жұмыс істеп тұр.
«Серіктестер мен мемлекеттік органдар алдындағы барлық міндеттемелер толық орындалады, ал қызметкерлерге еңбек өтіліне қарай төрт айлыққа дейін өтемақы төленеді. Сауда павильондарының 50 пайыздан астамын сақтау жоспарланып отыр, олар өңірдегі басқа наубайханалармен жұмысын жалғастырады», – деп хабарлады компания.
Зауыт орналасқан жерде кейін тау-кен жабдықтарын жөндеу және өндіретін жаңа кәсіпорын ашу жоспарланып отыр.
Бұрын «Сарыарқа Нан Қарағанды» зауытының тең құрылтайшыларының бірі Мәжілістің бұрынғы спикері Нұрлан Нығматулиннің інісі Ерлан Нығматулин болған. Қазір зауыт Forbes тізіміндегі бизнесмен Эдуард Огайдың ұлы Владислав Огайға тиесілі.