Нигерияда Temu-ге қатысты тергеу басталды

Нигерияның Деректерді қорғау жөніндегі комиссиясы (NDPC) Temu-ге қатысты тергеу бастады. Қытайлық маркетплейс онлайн-аңду жүргізді, деректерді заңсыз шетелдерге тасымалдады және пайдаланушылардың жеке ақпаратын өзге де заңсыз тәсілдермен өңдеді деген күдікке ілініп отыр.

NDPC мәлімдемесінде Temu елдің 12,7 миллион азаматының жеке деректеріне иелік ететіні айтылған. Ұйым басшысы Винсент Олатунджи жеке деректерді өңдеу және сақтау ережелері бұзылғаны дәлелденсе, маркетплейс қатаң жазаға тартылуы мүмкін екенін атап өтті. Өз кезегінде Temu-ге иелік ететін PDD Holdings компаниясы тағылған айыптарды негізсіз деп атады.

Нигерия – Африкадағы ең ірі нарықтардың бірі. Егер заңбұзушылықтар дәлелденсе, NDPC Temu-ге қатаң санкциялар салуға құқылы болады. Бұл өз кезегінде қытайлық маркетплейстің Африкадағы позициясына әсер етуі мүмкін.

Жеке деректерді заңсыз жинау және пайдалану бойынша Temu-ді тек Нигерия ғана емес, басқа елдер де айыптап отыр. Бұған дейін АҚШ-та да ритейлерге қарсы талап-арыздар берілген. Аризонаның бас прокуроры Крис Мэйес Temu геолокация мен смартфонда орнатылған басқа қолданбалардағы деректерді қоса алғанда пайдаланушылары туралы деректерді көп көлемде жинайтынын атап өтті.

«Қосымша сізді қайда барсаңыз да анықтай алады: дәрігердің қабылдауында, қоғамдық кітапханада, саяси іс-шарада, достарыңыздың жанында. Яғни жеке өмірге араласу ауқымы өте кең. Сондықтан мен мұны Аризона штатының тұтынушыларды алаяқтықтан қорғау туралы заңын бұзудың біздің штатта бұрын-соңды болмаған ең ауыр жағдайы деп санаймын», – деп мәлімдеген еді Мэйес.

Қазақстандық БАҚ та Temu қосымшасындағы жеке деректердің қауіпсіздігіне қатысты қауіптер туралы жазған. Сарапшылар Temu-дің Қытай үкіметімен ықтимал байланысына назар аударған. Атап айтқанда, Temu өзінің бас компаниясы арқылы People’s Data компаниясымен тікелей байланысты екені айтылған. Бұл құрылым іс жүзінде Қытай Коммунистік партиясы мен Орталық комитеттің бөлімшесі саналады.