Назарбаевтың тоқалы Әсел Исабаева көпшілік алдына қайта шыға бастады
Экс-президент Нұрсұлтан Назарбаевтың екінші жұбайы Әсел Исабаева Астанада өткен Kazakhstan Fashion Week сән апталығында көпшіліктің назарына ілікті. Іс-шарадан түсірілген фотосуреттер әлеуметтік желілерде кеңінен тарап жатыр.
Астана, NEGE. Әлеуметтік желілерде тараған фотосуреттерден оның сән көрсетіліміне қонақ ретінде шақырылғанын байқауға болады. Кадрларды Instagram парақшасында Қазақстанның еңбек сіңірген спорт шебері, бапкер Әлия Юсупова жариялаған.
Сондай-ақ Threads желісінде де Исабаеваның елордалық сән әлемі өкілдерімен бірге түскен суреттері тарады.
Бұл – Әсел Исабаеваның соңғы уақытта медиа кеңістікке екінші рет шығуы. Бұған дейін наурыз айында фотограф Мирас Баянов оның жаңа фотосессиясын жариялаған болатын.
Нұрсұлтан Назарбаев 2023 жылы жарық көрген «Менің өмірім. Бодандықтан – бостандыққа» атты мемуарында Әсел Исабаеваны екінші жұбайы ретінде алғаш рет ресми түрде атап өткен. Сондай-ақ олардың Тауман және Бәйкен есімді екі ұлы бар екенін жазған.