Назарбаевтың бейресми әйелі атанған Әсел Құрманбаеваның әпкесі Дубайда элиталы пәтер алған
Біріккен Араб Әмірліктеріндегі (БАӘ) жылжымайтын мүлік иелері туралы мәліметтер жария болғаннан кейін Нұрсұлтан Назарбаевтың кенже әйелі Әсел Құрманбаеваның әпкесі Ақмарал Есполованың Дубайдағы Paramount Tower Hotel & Residences тұрғын үй кешенінен 150 шаршы метрлік пәтер иесі екені анықталды. Пәтердің бағасы шамамен 3,5 миллион дирхам (қазіргі бағаммен 520 миллион теңгеге жуық), деп хабарлады «Выход к морю» Telegram арнасы.
Алматы, NEGE. Ақмарал Есполоваға тиесілі үш жатын бөлмесі және 15 м² террасасы бар пәтер 66 қабатты Paramount Tower Hotel & Residences ғимаратының 40-қабатында орналасқан. Бұл кешен 2021 жылы Қытайдың мемлекеттік құрылыс корпорациясы тарапынан салынған. 15–25-қабаттарында сән-салтанатты қонақүй болса, 26–63-қабаттар элиталық тұрғын үйлерге арналған. Соңғы қабатта бассейн бар.
Ақмарал Есполова – Әсел Құрманбаеваның (анасының тегін алған) әкелері бір, аналары бөлек әпкесі. Ол – белгілі академик Тілектес Есполовтың қызы. Әсел кейін Нұрсұлтан Назарбаевтың бейресми әйелі атанған. Жазба авторларының айтуынша, ол да академик Есполовтың некесіз туған қызы болуы мүмкін. Ресми некеде академиктің төрт баласы бар. Бірақ Әсел 1980 жылы туған, Ақмаралдан екі жылдан кейін және Ақтоты, Айдос пен Бектенбай Есполовтардан бірнеше жыл бұрын дүниеге келген.
Ақмарал Есполова туралы көп ақпарат жоқ. Ол бір кездері Александр Клебанов және Сергей Канмен бірге «Орталық Азия отын-энергетикалық компаниясы» АҚ-ның шамамен үштен бір акциясына иелік еткен. Кейін компанияның энергетикалық активтерін басқару құрылымы өзгеріп, үлестер Кан мен Клебанов арасында қайта бөлінген. Сонымен қатар, Ақмарал Есполова Астанада тіркелген YN LLC құрылыс компаниясының иесі.
