Мұсылмандарға дипфейк жасауға бола ма?
Қазақстан мұсылмандары діни басқармасының Ғұламалар кеңесі дипфейк технологиясын қолдануға қатысты пәтуа жариялады.
Астана, NEGE. Муфтият бұл технологияны пайдаланып, адамның шын мәнінде айтпаған сөздерін айтқандай немесе жасамаған іс-әрекеттерін жасағандай етіп көрсетіп, жалған ақпарат тарату мен жұртты алдауға шариғатта тыйым салынатынын атап өтті.
«Deepfake технологиясы арқылы адамның шын мәнінде айтпаған сөздерін айтқандай немесе істемеген іс-әрекеттерін істегендей етіп жасау, жалған ақпарат тарату, шариғат бойынша қатаң тыйым салынады. Мұндай жалған ақпарат тарату ел тыныштығын бұзып, қоғам ішінде іріткі тудырады. Алдын алмаса, салдары елдің ынтымақ-бірлігіне сызат түсіріп, қоғамға залалын тигізеді», – делінген ресми хабарламада.
Ал егер бұл технология игі мақсатта қолданылса, онда оған рұқсат етіледі.