Мұрат Әйтенов Тұран шағын ауданының инфрақұрылым жүйелерінің құрылыс барысын тексерді
Шымкент қаласының әкімі Мұрат Әйтенов жұмыс сапары барысында халықпен кездесті.
Шымкент, NEGE. Қала әкімі Тұран шағын ауданын толық аралап, инфрақұрылым жүйелерінің құрылыс барысын тексеріп шықты.
Тұран шағын ауданынында былтырдан бері сапалы электр қуатымен қамту жұмыстары басталып кеткен. Электр қуатының барынша сапалы болуын әкім өзі қадағалап, жұмыс барысымен танысып отырады.
Құрылыс барысы 2 кезең бойынша жобаланды. Бүгінде негізгі жұмыстың 86%-ы орындалып қойған. Енді қазан айында аяқталғанын күтіп отыр. Одан соң абоненттеу жұмысы жүргізіліп, ел игілігіне өтеді. Атқарылған жұмыстың нәтижесінде 3058 тұтынушы сапалы электр қуатымен қамтылады.
Жалпы Тұран шағын ауданының инфрақұрылымы қала басшылығының толық бақылауында. Мәселен 11,6 шақырымға созылған магистралдық кәріз коллекторының құрылысы аяқталған. Енді ішкі орамдық кәріз жүйесі салынып жатыр. Ол да жыл соңына дейін қолданысқа беріледі.
Әкімнің келесі бағыты Тұрандағы газ құрылысын тексеру. Екінші кезек бойынша жұмыстың 90% орындалып, қазан айы басталғанша №14-29 кварталда орналасқан көпқабатты және 504 жеке тұрғын үй көгілдір отынмен қамту жоспарда бар.
Ал үшінші кезек бойынша, құрылыс жұмысы 2022 жылдың мамыр айында басталған. Бүгінгі күнге дейін жұмыстың 40% атқарылды. Атқарылатын жұмыстар әлі алда. Нақты істер уақытымен жүргізіліп, қолданысқа беріледі. Мұның барлығы қаладағы аудандарды дамытудың алғышарттары.
Жұмыс қарқыны жақсы болса, Тұран шағын ауданындағы 2554 тұрғын үйге 2023 жылы газ құбыры толық тартылып бітеді. Жоспарлы жұмыстың нәтижесінде көгілдір отын көпті қуантпақ.
Шымкент қаласының әкімі Мұрат Әйтенов жүктелген жұмыстардың дер кезінде кестеге сай, әрі сапалы орындалуын қадағалайды. Сол себепті әкім жауапты мекемелерге бірқатар нақты тапсырма берді.
