Молдова билігі Нұрлан Сабуровтың концертін өткізбеуге кеңес берді
Молдова Республикасының Мәдениет министрлігі қазақстандық әзілкеш Нұрлан Сабуровқа қатысты мәлімдеме жасады.
Астана, NEGE. Мәлімдеме ведомствоның желідегі парақшасында жарияланды.
«Мәдениет министрлігі Диана Арбенинаның, Нұрлан Сабуровтың және Олег Винниктің қатысуымен өтуі тиіс Молдова Республикасында жоспарланған үш іс-шараны өткізуді орынсыз деп санайды», – делінген хабарламада.
Концертті ұйымдастырушыларға аталған тұлғалармен келісімшартты бұзу ұсынылған. Бұл шешім, министрлік мәліметінше, «олардың Молдова Республикасының аумағына кіруінің мүмкін болмауына және іс-шаралардың тоқтатылуына алып келуі мүмкін жағдайлардың алдын алу үшін» қабылданған.
Еске салайық, бұған дейін ресейлік БАҚ-та Сабуровқа Ресей Федерациясының аумағына 50 жылға кіруге тыйым салынғаны жайлы ақпарат тарады. Әзілкеш бұл жаңалықты Дубайдан Мәскеуге ұшып келген сәтінде Внуково әуежайында бір-ақ білген. Нәтижесінде ол Қазақстанға оралуға мәжбүр болды.
Сондай-ақ Қазақстанның Ұлттық қауіпсіздік комитеті комик Нұрлан Сабуровтың әрекеттерін тексеріп жатыр. Оған «Вагнер» легионының Истра бөлімшесіне 10 эндуро мотоциклін бергені және «Все для Победы» қорына 2 млн рубль аударғаны туралы ақпарат себеп болған.
Украинада Сабуровтың үстінен қылмыстық іс қозғалды.