Мас судья жарамдылық мерзімі өткен жүргізуші куәлігімен ұсталды – ІІМ
Қазақстанның Ішкі істер министрлігі судьяның мас күйінде көлік жүргізгенін растады.
Астана, NEGE. Ведомствоның хабарлауынша, 1 қараша күні таңғы сағат 04:30 шамасында Астанадағы «Хан Шатыр» сауда орталығының маңында полиция қызметкерлері Mazda-6 көлігін тоқтатқан. Көлікті елордалық азаматтық істер жөніндегі ауданаралық соттың судьясы басқарған.
«Тексеру барысында жүргізушінің алкогольдік мас күйінде болғаны және оның жүргізуші куәлігінің мерзімі өтіп кеткені анықталды», – делінген министрлік хабарламасында.
Оқиға материалдары Бас прокуратураға жолданды. Судьяны жауапкершілікке тарту мәселесін қарау үшін Жоғары сот кеңесіне ұсыныс енгізіледі.