«LOTOS-2025»: Халықаралық лотос фестивалі Атырау облысында өтеді
Бірегей өсімдік жыл сайын тек Атырау облысының Теңіз ауылындағы Қиғаш өзенінің атырауында гүлдейді.
Алматы, NEGE. Халықаралық мәдени-туристік фестиваль 26 шілдеден 26 тамызға дейін өтеді. Бұл мереке ерекше гүл – лотостың гүлдеуіне орайластырылған. Фестиваль жыл сайын өткізіледі, бірақ ол 2024 жылдан бастап ғана ұйымдастырыла бастады.
«Лотос — бұл табиғаттың ерекше сыйы, ол ежелден қасиетті гүл саналған. Ол тек сұлулығымен ғана емес, ерекше экожүйесімен де туристерді баурайды. Лотос гүлдейтін жерлер әлемде көп емес, сондықтан бұл өсімдікті Атырау облысының туристік брендіне айналдыру жоспарланып отыр», деп мәлімдеді Атырау облыстық ішкі саясат басқармасы.
Құрманғазы ауданындағы Теңіз ауылында орналасқан лотос алқабының ауданы шамамен 8–10 гектарды құрайды. Сабағының ұзындығы 1,5–2 метрге дейін жетсе, кейбір жапырақтарының диаметрі 60 сантиметрге дейін барады.
Фестиваль аясында бірнеше ұлттық спорт түрінен жарыстар өтеді: қазақ күресі, жамбы ату, қол күресі, асық ату, арқан тарту. Жеңімпаздар арнайы жүлделермен марапатталады.
Сонымен қатар этноауыл, қолөнершілер қалашығы және ұлттық тағамдар жәрмеңкесі ұйымдастырылады. Фестиваль қонақтары үшін қазақстандық эстраданың шақырылған жұлдызы өнер көрсетеді.